Ўзбекистон ва Германия афғон қочқинларининг эҳтимолий оқими билан боғлиқ муаммоларни биргаликда ҳал қилишга келишди

Ташқи ишлар вазирлигида 17 июль куни Ўзбекистон Президентининг Афғонистон бўйича махсус вакили Исматулла Иргашев Германия Ташқи ишлар вазирлигининг Шарқий Европа, Кавказ ва Марказий Осиё бўйича вакили Матиас Люттенберг билан учрашди.

Вазирлик матбуот хизматининг хабар беришича, учрашувда Афғонистондаги вазият юзасидан фикр алмашилди, ушбу мамлакатда тинчлик жараёнига ўзаро ёрдам бериш масалалари кўриб чиқилди.

Томонлар Афғонистондаги қуролли можаронинг авж олишидан хавотирларини билдирди ва дунё ҳамжамиятининг Афғонистонда тинчлик ҳамда барқарорликни қўллаб-қувватлаш борасидаги саъй-ҳаракатларини давом эттириш юзасидан гаплашди.

Мулоқот давомида томонлар Афғонистон борасида келгусида юзага келиши мумкин бўлган, хусусан, афғон қочқинларининг эҳтимолий оқими ва чегарадаги воқеалар билан боғлиқ муаммоларни биргаликда ҳал қилишга тайёр эканликларини билдирди.

Учрашувда Афғонистон халқига ҳар томонлама иқтисодий ва гуманитар ёрдамни давом эттиришда, шунингдек, Афғонистонда доимий ҳамда ҳар томонлама тинчликни ўрнатиш бўйича минтақадаги мамлакатларнинг роли муҳимлиги ҳам таъкидланди.

Эслатиб ўтамиз, Президент матбуот котиби Шерзод Асадов 12 июль куни ўтказилган брифингда 23 июндан бошлаб Афғонистоннинг қуролланган шахслари Ўзбекистон чегарасини бир неча маротаба ноқонуний бузиб ўтмоқчи бўлганини, уларнинг умумий сони шу кунга қадар 150 кишига етгани ва барчаси тергов, суриштирув ишлари олиб борилганидан кейин халқаро қонунчиликка мувофиқ ўз давлатига қайтариб юборилганини айтганди.

«Яъни ҳозирги кунда Ўзбекистон ҳудудида Афғонистоннинг бирорта фуқароси ноқонуний бошпана топгани йўқ ва чегараларимиз дахлсизлиги ҳеч қандай шубҳа остига қўйилмайди. Ўзбекистон келгусида ҳам ўз ҳудудига ноқонуний ўтишларга йўл қўймайди», — деган эди Асадов.