Тошкентда 4 ойлик чақалоғи бўлган 20 ёшли аёл эҳтиётсизлик оқибатида кўп қаватли уйнинг 9-қаватидан тушиб кетиб ҳалок бўлгани ҳақида хабар берилган эди. Қизнинг ота-онаси унинг ўлимида қайнонаси ва куёвини айбламоқда.
Марҳумнинг онаси «Human.uz»га берган интервьюсида қизи келин бўлиб тушган уйида доимий равишда тазйиқларга учраб келгани, ҳатто ҳомиладорлик пайтида ҳам калтакланганини билдирган.
Унинг сўзларига кўра, қизи эҳтиётсизлик оқибатида тушиб кетмаган, у ўз жонига қасд ҳам қилмаган. «У ҳеч қачон жонимдан тўйдим, ўламан деган гапларни гапирмаган. У ўзини ўлдирадиган қиз эмас эди, уни ўлдиришди», — деб таъкидлаган онаси ва уни уйидагилари деразадан ташлаганини гумонлаб, айбдорлар қонун олдида жавоб беришини талаб қилмоқда.
Онанинг қўшимча қилишича, қизининг жанозасига унинг қайнонаси ҳам, куёв ҳам келмаган.
Бош прокуратура матбуот хизматининг маълум қилишича, айни пайтда мазкур ҳолат юзасидан суриштирув ҳаракатлари олиб борилмоқда. Суриштирув давомида видеоёзувда кўрсатилган важлар ҳам ўрганиб чиқилиши таъминланади.
Изоҳ (0)