Маълумки, мамлакатимизда мобил қурилмаларнинг IMEI кодларини рўйхатга олиш тизими жорий этилган. Мазкур тизимни жорий этишдан мақсад — истеъмолчилар ҳуқуқини ҳимоя қилиш, республикага сифатсиз мобил қурилмалар кириб келиши ва ноқонуний савдосининг олдини олиш.
«Ўзбекистон телекоммуникация тармоқларини бошқариш республика маркази» ДУК — тизим оператори томонидан мобил қурилмаларнинг IMEI кодларини рўйхатдан ўтказиш учун шахснинг паспорт маълумотлари, учинчи шахслар томонидан ноқонуний фойдаланишнинг олдини олиш мақсадида, мобил қурилмаларни рўйхатдан ўтказиш жараёнига қўшимча текширув алгоритми киритилган. Қурилманинг IMEI кодини рўйхатдан ўтказишда жисмоний шахсларнинг абонент рақами маҳаллий мобил операторларидан ариза берувчи номига расмийлаштирилиши талаб этилади.
Умуман олганга, мобил қурилмалар IMEI кодларини рўйхатга олиш тизимининг жорий этилиши адолатли рақобат муҳитини юзага келтирди. Бу тизим сабаб ноқонуний ишлаётган тадбиркорлар фаолияти қонунийлаштирилиб, бугунги кунда 70 га яқин импортёрлар фаолият юритмоқда. Ваҳоланки, бир йил аввал импортёрлар бармоқ билан санарли даражада кам эди. Бугунги кунга келиб республикада рўйхатдан ўтказилаётган 77 фоиздан ошиқ мобил қурилмалар расмий равишда импортёрлар томонидан тақдим этилаётган буюртмаларга асосан рўйхатга олинмоқда. Қолган қисми фуқаролар томонидан четдан олиб келинаётган ёки почта орқали етказилаётган қурилмаларни ташкил этмоқда.
Айни кунларда IMEI кодларни рўйхатдан ўтказиш билан боғлиқ ижтимоий тармоқларда айрим танқидий фикрлар, жумладан, фуқароларнинг шахсий маълумотлари ўғирланиши, рўйхатдан ўтишда бюрократик ва мантиқсиз тўсиқлар қўйилиши каби тизимга айб қўйилмоқда. Хўш, ушбу фикрлар қанчалик асосли?
Аввало, юқорида қайд этиб ўтилганидек, мобил қурилмалар IMEI кодларини рўйхатга олиш тизими истеъмолчилар ҳуқуқини ҳимоя қилиш, республикага сифатсиз мобил қурилмалар кириб келиши ва унинг ноқонуний савдоси олдини олиш мақсадида йўлга қўйилган. «Ўзбекистон телекоммуникация тармоқларини бошқариш республика маркази» давлат унитар корхонаси томонидан айни шу мақсадда тизимли ишлар олиб борилмоқда.
Тизим билан боғлиқ танқидий фикрларга тўхталадиган бўлсак, яъни фуқароларнинг шахсий маълумотлари ўғирланиши корхона фаолиятига боғлиқ эмас. Буни соддароқ, амалий жараён билан боғлаб тушунтирадиган бўлсак, жорий йил бошидан «ЎзТТБРМ» ДУК (мобил қурилмаларнинг IMEI кодларини рўйхатга олиш тизими оператори)га паспорт маълумотлари бегона шахслар томонидан ноқонуний фойдаланилиб келинаётганлиги бўйича кўплаб мурожаатлар келиб тушмоқда. Тизим оператори томонидан интернет тармоғи орқали огоҳлантирувчи чоралар берилаётганлигига қарамасдан, кўплаб истеъмолчилар мобил қурилмаларни харид қилишда шу жиҳатларга эътибор қаратмаяпти.
Жумладан, бугунги кунда бегона паспорт маълумотларига 200 мингдан кўп мобил қурилмаларнинг рўйхатга олиниш ҳолатлари аниқланган (бундай қурилмалар белгиланган тартибда тизимдан ўчирилган ҳамда ҳақиқий паспорт эгаларига, уларга тегишли бўлган мобил қурилмалар расмийлаштирилган).
Табиийки, шу ўринда ҳақли савол туғилади: нима учун шундай? Чунки рўйхатга олиш жараёни онлайн режимда амалга оширилади ва тизим оператори жараённинг иккинчи томонида рўйхатдан ўтказувчининг кимлиги, паспорт эгаси ёки қоидабузар бўйича маълумотга эга эмас. Бу ўринда UzIMEI тизим оператори фуқароларнинг паспорт маълумотларини бегона шахслар томонидан фойдаланилиши бўйича жавобгар ҳисобланмайди.
Онлайн режимида рўйхатга олишни бекор қилиш, бошқача айтганда, ижтимоий тармоқлар орқали «рўйхатдан ўтишда бюрократик ва мантиқсиз тўсиқлар»ни бекор қилиш истеъмолчиларнинг янада кўпроқ норозиликларига олиб келади. Чунки бундай вазиятда ҳар бир фуқаро рўйхатдан ўтиш учун тизим оператори офисларига келиши талаб этилади. Бу фуқароларнинг ортиқча вақт йўқотишига олиб келади.
Бу борада аҳолига қулайлик яратиш мақсадида, ҳозирги кунга қадар Қорақолпоғистон Республикаси, барча вилоятлар ва Тошкент шаҳрида мобил қурилмаларнинг IMEI кодларини рўйхатга олиш пунктлари фаолият юритмоқда. Тизим оператори томонидан республиканинг барча ҳудудларида хизмат кўрсатиш пунктларини очиш ишлари давом эттирилмоқда.
Энг асосийси, мана бир ой вақт ўтди пойтахтнинг энг машҳур савдо мажмуаларидан бири бўлган «Малика» бозорида ҳам тизим операторининг шохобчаси ишлаб келмоқда. Савдо мажмуага келган ҳар қандай харидор мобил қурилмани сотиб олишдан олдин унинг IMEI кодлари рўйхатдан ўтганлиги (ўтмаганлиги) ёки кимни номидан ўтганлигини (бировнинг паспорт маълумотларига), расмий равишда импорт қилинганлиги тўғрисида бепул маълумот олиши мумкин. Бу хизматдан «Малика» савдо мажмуасидан чиқмаган ҳолда фойдаланиши истеъмолчиларга анча қулайлик яратилди.
Ҳозирги вазиятдан келиб чиқиб, фуқароларга уларнинг шахсий маълумотлари (паспорт) бегона шахслар томонидан фойдаланилишининг олдини олишда янада эътиборли бўлиши мақсадга мувофиқ. Чунки фуқаро паспорт маълумотларини бегоналарга бермаса, рўйхатдан ўтишда (шахсий маълумотлар ўғирланиши) ҳеч қандай муаммо бўлмайди.
Мухтасар айтганда, мобил қурилмалар IMEI кодларини рўйхатга олиш тизими янада такомиллаштирилиб, том маънода истеъмолчилар ҳуқуқини ҳимоя қилишга хизмат қилади.
Реклама ҳуқуқи асосида.
Изоҳ (0)