Хитойнинг UBTECH Robotics компанияси инсон каби ҳаракатлана оладиган Walker Х роботини тақдим этди. У тўсиқларни босиб ўтади, «қўли»га турли буюмларни олади ва инсонларга хос овозда мулоқот қилади. Роботнинг имкониятлари тасвирланган видео компаниянинг YouTube’даги каналида пайдо бўлди.
Walker Х’нинг аниқ ўлчами номаълум. Унинг қўллари, оёқлари ва боши инсонники каби яратилган, шунингдек, 31 та сервомотор билан жиҳозланган. Қўл кафти бешта бармоқдан иборат бўлиб, робот уларни буккан ҳолда турли буюмларни ушлаши ёки бутилка қопқоғини очиши мумкин.
Шу билан бирга, робот кўтара оладиган предметларнинг максимал оғирлиги 2,7 килограммни ташкил этади.
Walker Х автоном ҳолатда ўзига таниш бўлган ва янги жойларда харита (SLAM) ёрдамида ҳаракатлана олади. Ҳаракатланишининг максимал тезлиги соатига 3 километр.
Бундан ташқари, робот зина орқали кўтарилади ва қиялик бўйлаб юра олади, орқасидан кимдир турца, йиқилиб кетмайди.
Аввалроқ Хитойда тиш қўйишга қодир стоматолог-робот, Австралияда эса олма теришга қодир робот яратилгани тўғрисида хабар берилганди.
Изоҳ (0)