Америка Кубогининг финал ўйини Ўзбекистон вақти билан 11 июль тонгида бўлиб ўтади.
Америка Кубоги—2021
Финал баҳси
11 июль, якшанба
Аргентина — Бразилия 05:00
«Маракана». Бразилия, Рио-де-Жанейро
Фото: «Дарё»/ Ҳусан Собитов
Аргентина
Месси Америка Кубоги финалида уч марта, Жаҳон Чемпионати финалида бир марта мағлубият аламини тотиб кўрди. Бу аргентиналик футболчига ўзига хос босим юклаши мумкин. Мухлислар соврин кутмоқда, Леонинг эса вақти ўтяпти: кейинги Америка Кубогида Месси 38 ёшда бўлади. Балки унда Лео фаолиятини якунлаган бўлар. Шунинг учун аргентиналик юлдуз учун бу терма жамоада соврин ютиш учун охирги имконият бўлиши мумкин.
Ҳозир Аргентина терма жамоаси яхши формада ва Мессининг ўзи ҳам мусобақада 4 та гол ва 5 та голли узатмани амалга оширди. Скалони Леодан фойдаланиш йўлини топа олди. Сардор Родриго де Пауль ва Жованни ло Челсо билан бир-бирларини тушуниб ўйнаяпти. Улардан ташқари ҳужумда Лаутаро Мартинес ҳам бор. Жамоа яхлит бир механизм бўла олди.
Лионель Месси ўз эҳтиросларини ҳар доим ҳам намойиш қилавермайди. Бироқ бир ҳодисадан кейин футбол олами илк бор Мессининг омма олдида йиғлашига гувоҳ бўлади... (Давомини ўқиш)
Бразилия
Ушбу мусобақада «селесао» қойилмақом натижаларни кўрсатмоқда. 6 ўйинда 5 ғалаба бразилияликларнинг финалга ҳақли равишда чиққанини билдиради. Жамоанинг асосий юлдузи Неймар ҳам яхши формада. Амалдаги чемпион Бразилия Америка Кубогида 10-совринни қўлга киритишни мақсад қилган.
Бразилиянинг чап қанотида муаммолар юзага келди: Алекс Сандро жароҳат олди ва катта эҳтимол билан финални ўтказиб юборади. Унинг ўрнига майдонга тушиши кўзда тутилган Ренан Лоди эса ҳужумга чиқиб кетишни яхши кўради. Мессининг ўша қанотдан ҳужумга ўтишини ҳисобга олсак, Фредга жуда катта босим тушади. Бразилиянинг нозик жойи чап қанот бўлиб қолди. Албатта, Тите Мессини тўхтатиб қолиш усулларини билишини айтди. Ҳаммаси энди финалда ҳал бўлади.
Мураббийлар фикри:
Фото: Getty Images
Албатта биз ғалаба қозонишни хоҳлаймиз. Бўлмаса шунча ҳаракат қилмасдик. Лионель Месси ҳар қандай ҳолатда ҳам дунёнинг энг яхши футболчиси эканлигини исботлаб бўлган. Ҳаттоки, рақиблар ҳам буни тан олади.
Лионель Скалони, Аргентина терма жамоаси бош мураббийи
Фото: Getty Images
Биз финалда ғалаба қозонишни истаймиз. Мен Мессини тўхтатиб қолиш йўлини биламан, лекин айтмайман. Аргентиналиклар Неймарни қандай тўхтатиб қолмоқчилигини айтса, мен ҳам сирни очаман. Бизни ажойиб шоу кутмоқда.
Тите, Бразилия терма жамоаси бош мураббийи
Тахминий таркиблар:
Фото: «Дарё»/ Ҳусан Собитов
Аргентина: Мартинес, Лусеро, Пеццелья, Отаменди, Тальяфико, Родригес, Ло Чельсо, де Пауль, Гонсалес, Лаутаро Мартинес, Месси.
Бразилия: Эдерсон, Данило, Маркиньос, Тиаго Сильва, Лоди, Каземиро, Фред, Ришарлисон, Пакета, Эвертон, Неймар.
Жамоаларнинг охирги 5 ўйини статистикаси:
Фото: «Дарё»/ Ҳусан Собитов
Барча мусобақаларнинг онлайн жадваллари, ўйинлар тақвими, тўпурарлар рўйхати энди битта жойда — кўриш.
