Bugun,

  • USD 11095.31
  • RUB 173.84
  • EUR 10772.44

Buxoro viloyatining Shofirkon tumanida maktabni mukammal ta’mirlash ishlarida bajarilmagan ishlarni “bajarildi”, deb ko‘rsatib, davlat budjetidan 32 million so‘mning talon-toroj bo‘lishiga sababchi bo‘lgan qurilish tashkiloti mas’uli javobgarlikka tortildi. Bu haqda “Daryo”ga Jinoyat ishlari bo‘yicha Shofirkon tuman sudi raisi Ulug‘bek Bozorov ma’lum qildi.

Foto: Jinoyat ishlari bo‘yicha Shofirkon tuman sudi

Foto: Jinoyat ishlari bo‘yicha Shofirkon tuman sudi

Ma’lum bo‘lishicha, 2019-yil 18-mart kuni buyurtmachi Buxoro viloyat hokimligi huzuridagi yagona buyurtmachi xizmati injiniring kompaniyasi Shofirkon tumanidagi “Elshod qurilish servis” MCHJ rahbari lavozimida ishlab kelayotgan 30 yoshli Elshod Rustamov (tashkilot nomi va rahbarining ism-sharifi o‘zgartirilgan) bilan shartnoma imzolagan. Shartnomaga ko‘ra, pudratchi tumandagi “Talisafed” MFY hududida joylashgan 21-sonli umumiy o‘rta ta’lim maktabi binosini zamon talabiga mos ravishda mukammal ta’mirlash majburiyatini olgan. Shunga muvofiq, injiniring kompaniyasi tomonidan maktabni mukammal ta’mirlash ishlarini amalga oshirish uchun 2 milliard 946 million 392 ming so‘m miqdoridagi mablag‘ yo‘naltirilgan.

2019-yilning 19-noyabr kuni pudratchi ishning to‘liq yakunlaganini ma’lum qilgan. Qurilish obyektini qabul qilib olish jarayonida maktabning loyihadagi singari mukammal emasligiga shubha tug‘ilgach, nazorat idoralaridan iborat ishchi-guruh tuzilib, qurilish obyektini nazorat o‘lchovidan o‘tkazishga kirishilgan.

O‘rganish jarayonida hisob-faktura ma’lumotnomalarida ko‘rsatilgan ishlarning bajarilmagani va yosh mansabdorning 32 million so‘mlik qurilish ta’mirlash ishlari bajarilmasada, bajarilgan deya ma’lumot bergani oshkor bo‘lgan.

“‘Elshod qurilish servis’ mas’uliyati cheklangan jamiyati tomonidan 5 ta holatda bajarilmagan ishlarga qo‘shib yozish natijasida jami 32 million 213 ming so‘mlik talon-torojliklarni yuzaga keltirgani aniqlandi”, — deydi Ulug‘bek Bozorov.

Sudlanuvchi iqtisodiyot sohasidagi jinoyatlar turkumiga kiruvchi o‘z xatti-harakatlariga to‘liq iqror bo‘lib, o‘z qilmishidan chin ko‘ngildan pushaymonligini bildirgan. Va u o‘zi tomonidan yetkazilgan moddiy zararni to‘liq qoplab bergan.

Bundan tashqari, sudlanuvchiga nisbatan Jinoyat kodeksining 167-moddasi 2-qismi “g” bandi (mansab mavqeyini suiiste’mol qilish yo‘li bilan talon-toroj qilish) qo‘llanilib, u bazaviy hisoblash miqdorining 80 baravari miqdorida, ya’ni 17 million 840 ming so‘m jarimaga tortilgan.

Izoh
Asosiy yangiliklar
Mahalliy
“Daryo” kundaligida 2-dekabrda sodir bo‘lgan eng muhim voqealar
Mahalliy
“Ifloslantiruvchi to‘laydi” tamoyili, “yashil sertifikatlar”, energiya ulushini kamaytirish: Mirziyoyev “yashil” iqtisodiyot taqdimoti bilan tanishdi
Dunyo
Britaniya razvedkasi Rossiya Ukrainadagi urushda quruqlikdan hujum qilolmayotgani sababini tushuntirdi