Англияда 19 июлдан коронавирус туфайли жорий қилинган чекловларнинг аксариятини бекор қилиш режалаштирилмоқда. Ушбу масала бўйича якуний қарор 12 июлда қабул қилинади. Бу ҳақда Буюк Британия бош вазири Борис Жонсон айтиб ўтди, деб ёзмоқда BBC.
Фото: BBC
Англияда хусусан, мажбурий ниқоб тақиш ва ижтимоий масофага риоя қилиш, бино ичида ва ташқарисида йиғилиши мумкин бўлган одамлар сонига қўйилган чекловлар ҳамда мажбурий тарзда уйдан ишлаш бекор қилинади. Шунингдек, корхоналар фаолиятидаги барча чекловлар олиб ташланади.
19 июлдан чекловларни бекор қилиш фақат Англия учун режалаштирилган — Шотландия, Уэльс ва Шимолий Ирландияда расмийлар коронавирусга қарши чораларни бекор қилиш муддатини мустақил равишда белгилайди.
«Агар бизга ёрдам берадиган ёзги ва мактаб таътиллари келиши билан яқин бир неча ҳафта ичида локдаундан халос бўлмасак, ўзимизга шундай савол беришимиз керак: ‘Ўзи қачон ундан воз кечишимиз мумкин?’», — деди Жонсон.
Бош вазирнинг таъкидлашича, аҳолини эмлашнинг юқори суръати туфайли чекловларни бекор қилиш имкони яралмоқда. Шу билан бирга, у коронавирусга чалиниш бўйича янги ҳолатлар кўпайганини тан олди ва пандемия 19 июлдан кейин тугамаслигини таъкидлади.
Буюк Британияда аҳолининг 68 фоизи COVID-19’га қарши эмланган, шулардан 50 фоизи вакцинанинг иккала дозасини олган. Мамлакат эмлаш даражаси бўйича дунёда етакчилар қаторига киради.
Шу билан бирга, Буюк Британияда, жумладан Англияда, июнь ойининг бошидан бошлаб коронавируснинг дельта штамми билан касалланиш қайта авж олди. Мамлакатда ҳар куни ўртача 24 минг кишида коронавирус аниқланмоқда; икки ҳафта ичида бу кўрсаткич 166 фоизга ўсди. Дастлаб, коронавирусга қарши асосий чекловларни бекор қилиш июнь ойининг охирига режалаштирилган эди. Аммо касалланишнинг янги ҳолатлари кўпайгани сабабли уни бир ой кейинга қолдиришга тўғри келди.
Эслатиб ўтамиз, Исландия ҳукумати 26 июндан мамлакатда коронавирус туфайли жорий этилган чекловларнинг барчасини бекор қилди. Мамлакатнинг 16 ёшдан ошган аҳолисининг 87 фоизи камида битта доза билан, 48 фоизи эса тўлиқ эмлангани шарофати билан чеклов чораларини бекор қилиш имконияти юзага келган.
