Ўзбекистонда 6—8 июль кунлари Эрон ҳудудларидан иссиқ ҳаво массаларининг кириб келиши туфайли жазирама иссиқ кучайиши кутилмоқда. «Ўзгидромет» маълумотларига кўра, ушбу кунларда ҳаво ҳарорати иқлимий меъёрлардан 5—8 даражага юқори бўлади. Кундуз кунлари ҳаво 41—43 даражагача, шимолда, жанубда ва чўл ҳудудларда эса 44—46 даражагача исийди.
«Дарё» манбаларининг хабар беришича, Президент Администрацияси 3 июль куни ҳукумат ва вилоят ҳокимликлари, вазирликлар, идоралар, хўжалик бирлашмалари раҳбарларига ҳаво ҳарорати кескин кўтарилиши оқибатида юзага келадиган нохуш ҳолатларнинг олдини олиш мақсадида шошилинч тарзда амалга оширилиши лозим бўлган чора-тадбирларни юборди.
Унга кўра, Қорақалпоғистон Республикаси Жўқорғи Кенгеси, Вазирлар Кенгаши, Тошкент шаҳар ва вилоятлар ҳокимликлари, туман (шаҳар) ҳокимликлари, мутасадди ташкилотлар ва идораларда доимий навбатчиликни йўлга қўйиш, зарур куч-воситалар ва махсус техникаларнинг тўлиқ шайлигини таъминлаш, аҳоли саломатлигини муҳофаза қилишга қаратилган комплекс чора-тадбирларни белгилаши лозим.
Одамлар гавжум жойларда, жумладан, бозорлар, сайилгоҳлар, кўнгилочар масканларда биринчи тиббий ёрдам кўрсатиш бўйича вақтинчалик тиббиёт пунктларини ташкил этиш зарур. Даволаш-профилактика муассасаларида иссиқ ҳаво оқибатида сурункали касалликлари хуруж қилиши мумкин бўлган тоифаларни эътиборга олиб, тегишли койка-ўринлар ва дори воситалари захиралари етарли миқдорда шакллантирилади.
Аҳолини ўз саломатлигини асраш учун ҳушёр бўлишга, кескин иссиқ ҳаводан ҳимояланиш, кўпроқ суюқлик истеъмол қилиш, зарурат бўлмаганда уйдан ташқарига чиқмасликка, айниқса, сурункали касаллиги бўлганлар, ёш болалар, ҳомиладорлар ва кексаларни ҳимоя қилишга чақирилмоқда.
Энергетика тармоқлари, жумладан, электр энергияси ва табиий газ таъминоти тизимларининг барқарор ишлашини таъминлаш вазифаси топширилди.
Қишлоқ хўжалигида кўп йиллик тажрибага эга бўлган соҳа мутахассислари, деҳқонлар ва олимларни жалб қилиб, экинларни ва яратилган ҳосилни сақлаб қолиш чоралари кўрилиши лозим.
ФВВга дарё, кўллар, аҳоли дам олиш масканларида хавфсизлик масалаларини кучайтириш топширилди.
Бундан ташқари, ноодатий иссиқ ҳаво натижасида кучли ёмғир ёғиши эҳтимолини инобатга олиб, жойларда сел тошқинлари хавфининг олдини олиш чораларини кўриш, тоғ ва тоғолди ҳудудлардаги ёриб чиқиши мумкин бўлган юқори тоғ кўллари бўйича сел йўллари ҳолатини назоратга олиш бўйича кўрсатмалар берилган.
Изоҳ (0)