Наманган вилояти ҳокими Шавкат Абдураззоқов 3 июль, шанба куни Чортоқ туманида бўлиб ўтган «Ҳоким ва ёшлар» учрашувида ёшларни китоб, газета ўқишга қайтариш кераклигини айтди.
«Бир балолар блокланди деб шов-шув қилишяпти. Уни бир ойга блоклаб, ҳаммани китобга, газетага ўтказиш керак. Одамлар вақтини бемаза хабарлар олиб қўйяпти. Китоб билан, ота-онаси билан гаплашадиган қилиш керак. Қайси ёш ота-онасининг олдига бориб, бир соат гаплашиб ўтира олади? Катталар ҳам бир соат гаплашиб ўтира олмайди. Аммо интернетда бир соат, ярим кун, бир кунлаб қолиб кетади», — дейди Шавкат Абдураззоқов.
Унинг таъкидлашича, ёшлар бекорчи хабарлар билан миясини тўлдириб олгани учун иши юришмаяпти. Шунинг учун улар интернетга, ўйинларга эмас, китобга, спортга, ота-онасидан дуо олишга ўтириши керак.
Эслатиб ўтамиз, Шавкат Мирзиёев 30 июнь куни Ботаника боғида ўтказилган Ўзбекистон ёшлари ва талабалари форуми доирасидаги нутқи давомида айрим тиктокерларнинг хатти-ҳаракатларини танқид қилганди. 2 июль куни Ўзбекистонда TikTok ва Twitter ишламай қолди. Кейинроқ «Ўзкомназорат» мамлакатда айрим ижтимоий тармоқлардан фойдаланиш расман чекланганини маълум қилди.
Тошкент шаҳар ҳокими Жаҳонгир Ортиқхўжаев 2020 йилнинг декабрида Тошкент Ёшлар форумининг очилишига бағишланган матбуот анжуманида Ўзбекистонда тиктокерларга тақиқ қўйиш эмас, балки уларни тўғри йўлга йўналтириш бўйича иш олиб бориш кераклигини айтганди.
Изоҳ (0)