Зимбабведа олий маълумоти ва компьютери бўлмаган Максвелл Чимедза исмли 27 ёшли ўқитувчи ўқувчиларни коллеж ва ОТМларга кириш имтиҳонларига тайёрлаб келмоқда, деб хабар беради Esquire.
Маълум қилинишича, дарс ўтишда у ўзининг арзон Samsung Galaxy А10S смартфони ва WhatsApp дастуридан фойдаланади.
«Мессенердаги ўқитувчи» ҳақидаги маълумотлар 2021 йилда мамлакатнинг турли нуқталаридаги 64 нафар ўқувчиси имтиҳонларни муваффақиятли топширгани, 41 нафар ўқувчиси эса энг юқори балларни тўплаганидан сўнг тарқалди. Таъкидланишича, Чимедза қиммат турувчи курслар ва репетиторлар билан бир қатордаги натижани қайд этган.
Масквелл Чимедза пойтахт яқинида Мбаре туманида истиқомат қилади — бу мамлакатнинг энг қашшоқ ҳудудларидан бири ҳисобланади. «Аниқлик киритмоқчиман, мен малакага эга ўқитувчи эмасман», — дейди Чимедза. Шу билан бирга, кўпчилик уни Dr. Maxx деб атайди.
Максвеллнинг ўзи 2012 йилда 14 та имтиҳон топширган, бироқ маблағи етарли бўлмагани учун университетга кира олмаган. Мамлакатдаги ишсизликка тўғридан-тўғри дуч келган йигит 2019 йилда болаларни WhatsApp орқали ўқитишга қарор қилган.
Чимедза мессенжерда алоҳида «синфлар» очган ва улар учун дарс жадвалларини тузган, керакли материллар бўйича ўқитиб, синов тестлари орқали ўқувчиларни текширишни бошлаган. Шу билан бирга, у имтиҳонларга тезлаштирилган тарзда тайёрлашга ихтисослашган.
«Имтиҳондан уч ой олдин ўқувчининг билимини у ‘аълў баҳо оладиган даражада тайёрлайман», — дея тан олади «малакасиз ўқитувчи».
Ўз меҳнати учун Максвелл ўқувчиларнинг ота-оналаридан «чойчақа» олиб келади — аввалига ҳар бир фан бўйича ойлик дарслар, тахминан, 10 доллар бўлган. 25 гигабайт мобил интернет учун Чимедза 40 долларга яқин пул тўлайди. Одатда мактаб ўқитувчилари ойига 260 доллар ишлаб топади.
Зимбабведаги аксарият мактаблар коронавирус пандемияси сабаб 2020 йилда ёпилган, шунингдек, жамоат транспортлари ҳаракати чекланган, шунинг учун ўқувчиларнинг кўп қисми масофавий таълимга ўтган.
Ҳукумат радио орқали мактаб дарсларини йўлга қўйган. Гап шундаки, мамлакатда интернет жуда қиммат (1 гигабайт учун салкам 10 доллар) ва оилаларнинг кўп қисмида компьютер орқали интернетга кириш имконияти йўқ.
Аммо мамлакатда мобил интернет борасида қатор пакетлар мавжуд бўлиб, унинг ёрдамида қатор дастурлар, жумладан, WhatsApp’дан фойдаланиш арзон тушади. Дастур мамлакатда жуда оммалашган, трафикнинг қарийб ярми ушбу мессенжер ҳисобига тўғри келади.
Чимедза Зимбабве ҳукуматини WhatsApp’дан фойдаланишни мактаб дастурига киритишга чақирмоқда, бу анъанавий таълим чегараларини кенгайтиришга хизмат қилади.
Изоҳ (0)