Zimbabveda oliy ma’lumoti va kompyuteri bo‘lmagan Maksvell Chimedza ismli 27 yoshli o‘qituvchi o‘quvchilarni kollej va OTMlarga kirish imtihonlariga tayyorlab kelmoqda, deb xabar beradi Esquire.
Ma’lum qilinishicha, dars o‘tishda u o‘zining arzon Samsung Galaxy A10S smartfoni va WhatsApp dasturidan foydalanadi.
“Messenerdagi o‘qituvchi” haqidagi ma’lumotlar 2021-yilda mamlakatning turli nuqtalaridagi 64 nafar o‘quvchisi imtihonlarni muvaffaqiyatli topshirgani, 41 nafar o‘quvchisi esa eng yuqori ballarni to‘plaganidan so‘ng tarqaldi. Ta’kidlanishicha, Chimedza qimmat turuvchi kurslar va repetitorlar bilan bir qatordagi natijani qayd etgan.
Maskvell Chimedza poytaxt yaqinida Mbare tumanida istiqomat qiladi — bu mamlakatning eng qashshoq hududlaridan biri hisoblanadi. “Aniqlik kiritmoqchiman, men malakaga ega o‘qituvchi emasman”, — deydi Chimedza. Shu bilan birga, ko‘pchilik uni Dr. Maxx deb ataydi.
Maksvellning o‘zi 2012-yilda 14 ta imtihon topshirgan, biroq mablag‘i yetarli bo‘lmagani uchun universitetga kira olmagan. Mamlakatdagi ishsizlikka to‘g‘ridan to‘g‘ri duch kelgan yigit 2019-yilda bolalarni WhatsApp orqali o‘qitishga qaror qilgan.
Chimedza messenjerda alohida “sinflar” ochgan va ular uchun dars jadvallarini tuzgan, kerakli materillar bo‘yicha o‘qitib, sinov testlari orqali o‘quvchilarni tekshirishni boshlagan. Shu bilan birga, u imtihonlarga tezlashtirilgan tarzda tayyorlashga ixtisoslashgan.
“Imtihondan uch oy oldin o‘quvchining bilimini u ‘a’lo’ baho oladigan darajada tayyorlayman”, — deya tan oladi “malakasiz o‘qituvchi”.
O‘z mehnati uchun Maksvell o‘quvchilarning ota-onalaridan “choychaqa” olib keladi — avvaliga har bir fan bo‘yicha oylik darslar, taxminan, 10 dollar bo‘lgan. 25 gigabayt mobil internet uchun Chimedza 40 dollarga yaqin pul to‘laydi. Odatda maktab o‘qituvchilari oyiga 260 dollar ishlab topadi.
Zimbabvedagi aksariyat maktablar koronavirus pandemiyasi sabab 2020-yilda yopilgan, shuningdek, jamoat transportlari harakati cheklangan, shuning uchun o‘quvchilarning ko‘p qismi masofaviy ta’limga o‘tgan.
Hukumat radio orqali maktab darslarini yo‘lga qo‘ygan. Gap shundaki, mamlakatda internet juda qimmat (1 gigabayt uchun salkam 10 dollar) va oilalarning ko‘p qismida kompyuter orqali internetga kirish imkoniyati yo‘q.
Ammo mamlakatda mobil internet borasida qator paketlar mavjud bo‘lib, uning yordamida qator dasturlar, jumladan, WhatsApp’dan foydalanish arzon tushadi. Dastur mamlakatda juda ommalashgan, trafikning qariyb yarmi ushbu messenjer hisobiga to‘g‘ri keladi.
Chimedza Zimbabve hukumatini WhatsApp’dan foydalanishni maktab dasturiga kiritishga chaqirmoqda, bu an’anaviy ta’lim chegaralarini kengaytirishga xizmat qiladi.
Izoh (0)