Бугун,

  • USD 11014.01
  • RUB 191.8
  • EUR 10674.78

АҚШ Афғонистондан ўз ҳарбийларини олиб чиқиб кетиш жараёнини август охирига қадар якунлашга умид қилмоқда. Бу ҳақда Оқ уй матбуот котиби Жен Псакига таяниб, «ТАСС» хабар берди.

Фото: «Зеркало.аз»

Фото: «Зеркало.аз»

«Ҳозирда биз бу жараённи (қўшинларни олиб чиқиш) август охирига қадар якунланишини кутмоқдамиз. АҚШ президенти Жо Байден Америка қўшинларини Афғонистондан олиб чиқиб кетишга ва у ерда 20 йил аввал бошланган урушни тугатишга қарор қилган», — деди у.

Матбуот котиби АҚШ қўшинларининг Баграм авиабазини тарк этаётгани ҳақидаги хабарлар борлигини тасдиқлади ва бу ҳақда Пентагон раҳбари баёнот беришини таъкидлади. «Аммо вақт масаласига келсак, биз август охиригача ҳарбийларни олиб чиқиб кетишни кутмоқдамиз», — қўшимча қилди Псаки.

Ундан АҚШ ўзи билан ҳамкорлик қилаётган афғонларни Марказий Осиё мамлакатларига вақтинча жойлаштирмоқчи экани ҳақидаги хабарларга изоҳ сўралди. «Бундай музокаралар ҳақида хабарлар бўлди, мен бирорта суҳбатни тасдиқлай олмайман, аммо шуни айтишим мумкинки, биз таржимон бўлиб ёки бошқа соҳаларда ишлаган виза талаб қилувчилар гуруҳини аниқладик, улар Афғонистон ташқарисидаги жойларга кўчирилади», — деб жавоб қилди Псаки. «Турли хил вариантлар мавжуд. Бу август охирида қўшинларни олиб чиқиб кетиш тугагунига қадар амалга оширилади.»

Пентагон вакили Жон Кирбининг маълум қилишича, Афғонистондаги Баграм авиабазасини тарк этганидан кейин ҳам АҚШ аксилтеррор операциялари учун минтақадаги имкониятларини сақлаб қолади. Унинг сўзларга кўра, Афғонистондаги АҚШ контингентининг қўмондонлик таркибидаги ўзгаришлар ва ҳарбийларнинг Баграм базасидан чиқиб кетиши америкаликларга бу мамлакатда оз сонли ҳарбийларни сақлаб туришга имкон беради.

«Ушбу ҳарбийлар келгуси даврда тўртта масалага йўналтирилади: мамлакатда дипломатик мавжудликни ҳимоя қилиш, аэропортда хавфсизликни таъминлаш, афғон ҳарбийлари ва хавфсизлик кучларини қўллаб-қувватлаш ва уларга ёрдам бериш ҳамда терроризмга қарши ҳаракатларни қўллаб-қувватлаш», — деди Кирби.

Пентагон вакилининг сўзларига кўра, Америка кучлари Баграм базасидан чиқарилгандан сўнг ҳам «миссия давом этади, аммо Афғонистон билан муносабатлар бутунлай бошқа йўналиш олади». «Ҳатто Афғонистондан ташқарида бўлсак ҳам,  минтақада кучли мавқеимиз бор. Терроризмга қарши курашиш учун зарур пайтда шай ҳолга келиш қобилиятимиз ҳали ҳам мавжуд», — деди у.

Кирбининг маълум қилишича, АҚШнинг Афғонистондаги ҳарбий контингенти АҚШ Қуролли кучлари Марказий қўмондонлиги раҳбари генерал Кеннет Маккензи назоратига ўтади, генералга тегишли ваколатларни топшириш жараёни бир неча ҳафта давом этади.

«Биз август охирига қадар Афғонистонни тарк этиш учун президент кўрсатмасига биноан қўшинларни хавфсиз ва тартибли олиб чиқишни давом эттирмоқдамиз. АҚШ Мудофаа вазири Ллойд Остин Афғонистондаги миссиямиз қўмондонлигини генерал-лейтенант Остин Скотт Миллердан генерал Кеннет Маккензига ўтказиш режасини тасдиқлади. Биз қўмондонлик ушбу ойнинг охирида топширилишини кутмоқдамиз. Генерал Миллер ваколат ва жавобгарликни генерал Маккензига топшириш ишларини тайёрлаш ва якунлаш учун яқин ҳафталардан Афғонистонда бўлади», — деди Кибри.

Унинг сўзларига кўра, Маккензи Афғонистондаги кучлар қўмондонлигининг барча ваколатларини ўз зиммасига олади.

Изоҳ
Асосий янгиликлар