Тошкентдаги Central Park истироҳат боғида «Инклюзив марафон-сайл» фестивали ташкил этилди. Ёшлар ишлари агентлиги, Миллий паралимпия қўмитаси, Ёшлар иттифоқи ҳамда «Меҳрли қўллар» имконияти чекланган ёшлар ва болалар маркази томонидан биринчи марта ўтказилган фестивалда 500 га яқин ногиронлиги бўлган шахслар, 200 дан ортиқ волонтёрлар, 50 га яқин ҳамкор ва ҳомий ташкилотларнинг вакиллари қатнашди.
Фестиваль инклюзив хайрия марафони билан бошланди — унда 100 га яқин ногиронлиги бўлган шахс қатнашди. Тадбир доирасида махсус ташкил этилган «Сурдо», «Брайл», «Касб-ҳунар», «Таълим», «Оксфорд», «Инклюзив», «Фотозона», «Паралимпия», «Инклюзив тўсиқ йўли» каби ҳудудларда турли ўйин ва мусобақалар, амалий машғулотлар ва учрашувлар ўтказилди.
24 июнь куни иш бошлаган «Ishplus.uz» лойиҳаси мутахассислари «Касб-ҳунар» зонасида ногиронлиги бўлган ва иш излаётган ёшларга зарур маслаҳатлар берди. Ҳозирча фақат Тошкентдаги ногиронлиги бўлган инсонлар фойдаланиши мумкин бўлган лойиҳа мувофиқлаштирувчиси Азиз Абдуллаевнинг айтишича, илк уч кунда «Ishplus.uz»га мурожаат қилган ногиронлиги бўлган 150 кишининг 50 дан ортиғи ўзига иш топган.
«Порталимизда ўқув курслари, вакансиялар ҳақида маълумотлар бор. Сайтдан рўйхатдан ўтиб, иш берувчилар ўзларидаги мавжуд бўш ўринлари ҳақида маълумот қолдиришлари, иш изловчилар эса вакансиялар билан танишишлари мумкин», — дейди Азиз Абдуллаев. Лойиҳа 2022 йилдан бутун Ўзбекистон бўйича иш олиб бориши кутилмоқда.
Абдуллаевнинг сўзларига кўра, мазкур лойиҳа «Шароит плус» ногиронлар жамоат бирлашмаси БМТ Тараққиёт дастуридан ютиб олган грант асосида иш бошлаган. Ўзбек тилида, тўлиқ инклюзивлаштирилган ҳолда фаолият олиб борувчи сайтдан «кўзи ожиз инсонлар ҳам бемалол фойдалана олади», дейди лойиҳа мувофиқлаштирувчиси.
Фестивальнинг «Таълим» зонасида бир қатор олий таълим муассасалари, хусусан, Тошкентдаги Халқаро Вестминстер университети (ТХВУ) томонидан ногиронлиги бўлган шахслар учун очиқ эшиклар куни ташкил этилди. Қайд этиш жоиз, ушбу университет БМТ Тараққиёт дастури томонидан имконияти чекланган, ногироглини бўлган шахслар учун Ўзбекистондаги энг қулай олийгоҳлардан бири деб эътироф этилган.
«Сайлда қатнашаётган ёшларнинг кўпчилиги биздан: ‘Университетингизда ўқисак, жисмоний жиҳатдан қийналмаймизми?’, деб сўраяпти. Шуни алоҳида таъкидлаш лозимки, Вестминстер университетида ногиронлиги бўлган шахслар учун пандуслар, махсус лифтлар ташкил қилинган. Қолаверса, университет ходимлари ҳам ҳар доим ёрдамга шай», — деди олийгоҳ вакили Абдуллоҳ Абдуғаффоров.
Қайд этишларича, Вестминстер университетига бакавлавриатга ўқишга кириш бўйича бу йилги имтиҳонларда ногиронлиги бор имконияти чекланган шахслар учун иккита махсус грант ўрни ажратилган.
Сайл доирасида паркнинг бир нуқтасида имконияти чекланган ёшлар тасвирий ва амалий санъат бўйича (миниатура, керамика, мултипликация, сомон санъати кабилар) ўзлари ишлаган асарларни намойиш этган бўлса, бошқа зоналарда ногиронлиги бўлган шахслар ўртасида теннис, шахмат-шашка, бадминтон, таэквондо бўйича мусобақалар ўтказилди.
Фестиваль доирасида ўтказилган марафон ва мусобақаларда ғолиб чиққан барча қатнашчиларга эсдалик совғалари топширилди. Шунингдек, фестиваль доирасида футбол бўйича карлар ўртасидаги Осиё чемпионатида учинчи ўринни қўлга киритган Ўзбекистон терма жамоаси аъзолари ҳам алоҳида тақдирланди.
«Инклюзив марафон-сайл» меҳмони бўлган Осиё паралимпия қўмитаси президенти Мажид Рашид фестиваль «келажак учун яхши қадам» эканини таъкидлаб, Ўзбекистон бу борада «яхши намуна кўрсатаётгани»ни мамнуният билан қайд этиб ўтди.
Изоҳ (0)