Тошкент шаҳридаги «Шаҳидлар хотираси» ёдгорлик мажмуасини таъмирлаш ишлари шаҳар ерларини сотиш эвазига таъмирланиши ҳақида хабар берилганди. Ушбу масала юзасидан пойтахт ҳокими ўринбосари Фурқат Маҳмудхўжаев ОАВ вакиллари билан учрашди, дея хабар қилмоқда «Дарё» мухбири.
Қайд этилишича, биринчи навбатда айнан «Шаҳидлар хотираси» мажмуасидаги ерлар сотилиши ҳақидаги хабарлар рад этилган.
«Ер сотилмайди! Буни аниқ қилиб ёзиб қўйишингиз мумкин. Тартиб орқали аукционга қўйилади.
Биринчи навбатда, кўтарилган масала айнан шу жойлардаги ерлар сотилиб, қурилиш шу ерда бўлади, деган гап. Ер бу ердан берилмайди, нотўғри талқин кетгандан кейин. Шу ердан уй қуриладими, бошқа нарса қуриладими, албатта, ҳар бир инсоннинг жаҳли чиқади.
Ташқарида қурилиши мўлжалланган амфитеатр ичкарида қуриладиган бўлди. Кўп масалалар жамоатчилик фикридан келиб чиқиб ихчамлаштирилди. Ихчамлашгандан сўнг харажат камаяди.
Ҳозир қайта ҳисоб-китоб бўлади, маҳаллий бюджет ҳисобидан ажратилган маблағ етадиган бўлса, аукцион шаҳарнинг бошқа исталган қисмида ўтказилиши мумкин. Ҳозир аниқ ҳисоб-китоб йўқ, бирламчи берилган маблағ етиши мумкин» – дейди Фурқат Маҳмудхўжаев.
«Дарё» мухбирининг «Тегишли ерларнинг аукционга қўйилиши мажмуани таъмирлаш билан параллел равишда бўляптими, яъни айнан шу аукциондан тушган маблағлар эвазига мажмуа таъмирланяптими?», деган саволига ҳокимлик вакили «Йўқ, йўқ, ундай эмас» дея жавоб берган.
Мавзуга доир: Фото: Тошкентдаги «Шаҳидлар хотираси» ёдгорлик мажмуасида олиб борилаётган қурилиш-таъмирлаш ишлари
Изоҳ (0)