“Yer sotilmaydi!”. “Shahidlar xotirasi” yodgorlik majmuasi shahar yerlarini sotish evaziga ta’mirlanishi haqidagi xabarlarga munosabat bildirildi

Toshkent shahridagi “Shahidlar xotirasi” yodgorlik majmuasini ta’mirlash ishlari shahar yerlarini sotish evaziga ta’mirlanishi haqida xabar berilgandi. Ushbu masala yuzasidan poytaxt hokimi o‘rinbosari Furqat Mahmudxo‘jayev OAV vakillari bilan uchrashdi, deya xabar qilmoqda “Daryo” muxbiri.

Qayd etilishicha, birinchi navbatda aynan “Shahidlar xotirasi” majmuasidagi yerlar sotilishi haqidagi xabarlar rad etilgan.

“Yer sotilmaydi! Buni aniq qilib yozib qo‘yishingiz mumkin. Tartib orqali auksionga qo‘yiladi.

Birinchi navbatda, ko‘tarilgan masala aynan shu joylardagi yerlar sotilib, qurilish shu yerda bo‘ladi, degan gap. Yer bu yerdan berilmaydi, noto‘g‘ri talqin ketgandan keyin. Shu yerdan uy quriladimi, boshqa narsa quriladimi, albatta, har bir insonning jahli chiqadi.

Tashqarida qurilishi mo‘ljallangan amfiteatr ichkarida quriladigan bo‘ldi. Ko‘p masalalar jamoatchilik fikridan kelib chiqib ixchamlashtirildi. Ixchamlashgandan so‘ng xarajat kamayadi.

Hozir qayta hisob-kitob bo‘ladi, mahalliy budjet hisobidan ajratilgan mablag‘ yetadigan bo‘lsa, auksion shaharning boshqa istalgan qismida o‘tkazilishi mumkin. Hozir aniq hisob-kitob yo‘q, birlamchi berilgan mablag‘ yetishi mumkin” – deydi Furqat Mahmudxo‘jayev.

“Daryo” muxbirining “Tegishli yerlarning auksionga qo‘yilishi majmuani ta’mirlash bilan parallel ravishda bo‘lyaptimi, ya’ni aynan shu auksiondan tushgan mablag‘lar evaziga majmua ta’mirlanyaptimi?”, degan savoliga hokimlik vakili “Yo‘q, yo‘q, unday emas” deya javob bergan.