Сурхондарё вилоятининг Термиз шаҳридаги электр подстанция ҳудудида ёнғин содир бўлди, деб хабар бермоқда ФВВ матбуот хизмати.
Қайд этилишича, ёнғин 28 июнь куни соат 12:03 да Сурхондарё вилояти Термиз шаҳар «Тупроққўрғон» МФЙ Денов кўчасида жойлашган электр подстанция ҳудудидаги трансформаторларнинг бирида юз берган.
Воқеа жойига Термиз шаҳар Фавқулодда вазиятлар бўлимининг 2 та ёнғин-қутқарув экипажлари соат 12:08 да етиб борган ва ёнғин соат 12:10 да ўраб олиниб, 12:18 да тўлиқ ўчирилган.
Ҳодисада жабрланганлар ва ҳалок бўлганлар йўқ. Ҳозирда ёнғин сабаби ва келтирилган зарар миқдори аниқланмоқда.
«Ҳудудий электр тармоқлари» матбуот хизматининг «Дарё»га маълум қилишича, ёнғин жамият тасарруфида бўлган 110/10/6 кВли «Шарқ» подстанциясида 1986 йилда ишлаб чиқарилган қуввати 6300 кВА бўлган Т-3 ва Т-4 куч трансформаторларида содир бўлган.
Ҳодиса оқибатида Термиз шаҳридаги «Жайхун», «Тупроққўрғон», «Алпомиш», «Боғишамол» ва «Шифокорлар» МФЙларининг айрим ҳудудларида электр энергияси таъминотида узилишлар содир бўлган.
Айни пайтда юзага келган фавқулодда ўчишни қисқа муддатда бартараф қилиш мақсадида жамият мутахассис ходимлари жалб қилиниб, камчиликлар бартараф қилинмоқда ва истеъмолчиларни электр энергияси билан таъминлаш чораси кўрилмоқда.
Эслатиб ўтамиз, 2021 йилнинг бошларида Сирдарё вилоятининг Ховос туманида трансформатор портлаб кетиши оқибатида 60 та хонадон электр энергиядан узилганди. Март ойида Тошкент вилояти Паркент туманидаги маҳаллаларнинг бирида жойлашган трансформатор подстанциясида ёнғин содир бўлганди.
Изоҳ (0)