Қашқадарё вилоятининг Қарши туманида фермернинг шартномада кўрсатилган ғалладан ташқари ҳосили ҳам мажбурий тартибда олиб қўйилди. Бу ҳақда «Дарё»га мурожаат қилган фермер Содиқ Маматов маълум қилди.
Фермернинг маълумот беришича, раҳбарлигидаги «Ражаб момо» фермер хўжалиги 2021 йилдаги ғалла режасини 239 фоизга бажарган. Бироқ режадан ортиқча 38 тонна ғалла ҳам мажбурий тартибда олиб қўйилган.
«Режам бўйича 40 тонна ғалла топширишим керак эди. Ҳосилим 78 тонна бўлди. Режамдан ташқари 38 тонна ғалла ҳам ички ишлар ходимлари ва Миллий гвардия хизматчилари ёрдамида тортиб олинди», — дейди Содиқ Маматов.
Фермернинг айтишича, ғалла йиғим-терими пайтида унинг даласини ИИБ ҳамда Миллий гвардия ходимлари босган.
«Ғалла йиғим-терим пайтида ҳосилимизга эга кўпаяди. Ҳамма бизга хўжайин. Бироқ фермер муаммога дуч келганда ҳеч қайси масъул эътибор бермайди. Бизга ҳосилни парвариш қилишда ички ишлар ходимлари ҳам, Миллий гвардиячилар ҳам ёрдам бермаган-ку. Нега бизнинг рухсатимизсиз даламизга бостириб киради? Ҳосилимизни тортиб олади? Бунинг чегараси борми?» — дейди ҳосили тортиб олинганини айтган фермер.
Содиқ Маматовнинг маълумот беришича, фермер хўжалиги 1999 йил ташкил этилган бўлиб, ўтган йиллар давомида фермер хўжаликлари ҳосилини суғурталовчи суғурта компаниялари фаолиятидан ҳам қониқмаган.
«Ҳар йили банкдан олинаётган кредитимиздан суғуртага деб 14—15 миллион сўмдан ушлаб қолишиб, суғурта компаниясига ўтказиб беришади. Аммо ўтган йиллар давомида бирорта фермерга суғурта пули тўлаб берилганини билмайман. Ўтган йили об-ҳаво инжиқликлари сабаб пахта ҳосил бермади. Шу сабаб кластердан қарздор бўлиб қолганман. Ғалладан тушган даромадимни пахта қарздорлигини ёпишга сарфламоқчи эдим. Лекин чучварани хом санаган эканман», — дейди фермер.
«Ражаб момо» фермер хўжалиги раҳбари режадаги 40 тонна ҳосилига давлат нархида пул тўланса ҳам, режадан ортган 38 тонна ғалласи бозор нархида харид қилинишидан умидвор.
«Майли, 40 тоннасига давлат нархида пул беришсин. Аммо қолган 38 тоннани бозор нархида олишсин ёки менга қайтариб беришсин. Бозорда сотиб, пахтадан қолган қарздорлигимни ёпай», — дейди фермер Содиқ Маматов.
Фермернинг мазкур эътирозига муносабат билдирган Қарши туман ҳокимлиги ахборот хизмати фермернинг эътирозини мантиқсизлик дея баҳолади.
«Вазирлар Маҳкамасининг 2021 йил 17 май кунидаги ‘2021 йил ҳосили учун экилган бошоқли дон ҳосилини ўз вақтида ва сифатли ўриб-йиғиб олишни ташкил этиш чора тадбирлари тўғрисида’ги қарорига асосан 2021 йил ҳосили учун экилган ғаллани ўз вақтида ва сифатли ўриб-йиғиб олишга кўмаклашувчи вилоят ишчи гуруҳи ҳамда туман ишчи гуруҳи тузилган. Ишчи гуруҳга Ички ишлар бошқармаси, Фавқулодда вазиятлар бошқармаси ва бошқа бир қатор корхона ҳамда ташкилотларнинг раҳбар ва ўринбосарлари ҳам киритилган. Бу эса ўз навбатида Вазирлар Маҳкамасининг юқоридаги қарори ижросини таъминлашга хизмат қилади. Фермер хўжалигининг ҳуқуқни муҳофаза қилувчи органлар ўзининг ер майдонига экилган дон маҳсулотларини ўриб-йиғиб олишда иштирок этаётганлигидан норози бўлган ҳолатлари мутлақо мантиққа зиддир», — дейилади туман ҳокимлиги ахборот хизмати муносабатида.
Қарши туман ҳокимлигининг маълумот беришича, фермер хўжалиги билан 20 гектар майдондан 40 тонна ҳосил олишга келишган «Қарши дон агро» МЖЧ кластер фермерга 28 гектар ерни ағдариш, ишлов бериш учун маблағ тўлаган. Фермер эса буни рад этмоқда.
«Қандай қилиб мен билан 20 гектар ердан ҳосил олиш учун шартнома тузишадию, 28 гектар ернинг харажатини тўлайди? Ёки кластерда шу даражада тушунмайдиган одамлар ишлайдими?» — дейди фермер.
Ҳокимлик ахборот хизмати раҳбари Тўлқин Турдиевнинг кластер масъулларига таяниб хабар беришича, айни кунга қадар ҳам ғалла нархи белгиланмаган. Шартномада ҳам ғалла нархлари кўрсатилмаган.
«Кластер масъуллари фермерни рози қиламиз дейишяпти. Давлат нархига 10 фоиз қўшиб бериб, фермер билан келишишларини айтди», — деди Тўлқин Турдиев.
Изоҳ (0)