Qashqadaryo viloyatining Qarshi tumanida fermerning shartnomada ko‘rsatilgan g‘alladan tashqari hosili ham majburiy tartibda olib qo‘yildi. Bu haqda “Daryo”ga murojaat qilgan fermer Sodiq Mamatov ma’lum qildi.
Fermerning ma’lumot berishicha, rahbarligidagi “Rajab momo” fermer xo‘jaligi 2021-yildagi g‘alla rejasini 239 foizga bajargan. Biroq rejadan ortiqcha 38 tonna g‘alla ham majburiy tartibda olib qo‘yilgan.
“Rejam bo‘yicha 40 tonna g‘alla topshirishim kerak edi. Hosilim 78 tonna bo‘ldi. Rejamdan tashqari 38 tonna g‘alla ham ichki ishlar xodimlari va Milliy gvardiya xizmatchilari yordamida tortib olindi”, — deydi Sodiq Mamatov.
Fermerning aytishicha, g‘alla yig‘im-terimi paytida uning dalasini IIB hamda Milliy gvardiya xodimlari bosgan.
“G‘alla yig‘im-terim paytida hosilimizga ega ko‘payadi. Hamma bizga xo‘jayin. Biroq fermer muammoga duch kelganda hech qaysi mas’ul e’tibor bermaydi. Bizga hosilni parvarish qilishda ichki ishlar xodimlari ham, Milliy gvardiyachilar ham yordam bermagan-ku. Nega bizning ruxsatimizsiz dalamizga bostirib kiradi? Hosilimizni tortib oladi? Buning chegarasi bormi?” — deydi hosili tortib olinganini aytgan fermer.
Sodiq Mamatovning ma’lumot berishicha, fermer xo‘jaligi 1999-yil tashkil etilgan bo‘lib, o‘tgan yillar davomida fermer xo‘jaliklari hosilini sug‘urtalovchi sug‘urta kompaniyalari faoliyatidan ham qoniqmagan.
“Har yili bankdan olinayotgan kreditimizdan sug‘urtaga deb 14—15 million so‘mdan ushlab qolishib, sug‘urta kompaniyasiga o‘tkazib berishadi. Ammo o‘tgan yillar davomida birorta fermerga sug‘urta puli to‘lab berilganini bilmayman. O‘tgan yili ob-havo injiqliklari sabab paxta hosil bermadi. Shu sabab klasterdan qarzdor bo‘lib qolganman. G‘alladan tushgan daromadimni paxta qarzdorligini yopishga sarflamoqchi edim. Lekin chuchvarani xom sanagan ekanman”, — deydi fermer.
“Rajab momo” fermer xo‘jaligi rahbari rejadagi 40 tonna hosiliga davlat narxida pul to‘lansa ham, rejadan ortgan 38 tonna g‘allasi bozor narxida xarid qilinishidan umidvor.
“Mayli, 40 tonnasiga davlat narxida pul berishsin. Ammo qolgan 38 tonnani bozor narxida olishsin yoki menga qaytarib berishsin. Bozorda sotib, paxtadan qolgan qarzdorligimni yopay”, — deydi fermer Sodiq Mamatov.
Fermerning mazkur e’tiroziga munosabat bildirgan Qarshi tuman hokimligi axborot xizmati fermerning e’tirozini mantiqsizlik deya baholadi.
“Vazirlar Mahkamasining 2021-yil 17-may kunidagi ‘2021-yil hosili uchun ekilgan boshoqli don hosilini o‘z vaqtida va sifatli o‘rib-yig‘ib olishni tashkil etish chora tadbirlari to‘g‘risida’gi qaroriga asosan 2021-yil hosili uchun ekilgan g‘allani o‘z vaqtida va sifatli o‘rib-yig‘ib olishga ko‘maklashuvchi viloyat ishchi guruhi hamda tuman ishchi guruhi tuzilgan. Ishchi guruhga Ichki ishlar boshqarmasi, Favqulodda vaziyatlar boshqarmasi va boshqa bir qator korxona hamda tashkilotlarning rahbar va o‘rinbosarlari ham kiritilgan. Bu esa o‘z navbatida Vazirlar Mahkamasining yuqoridagi qarori ijrosini ta’minlashga xizmat qiladi. Fermer xo‘jaligining huquqni muhofaza qiluvchi organlar o‘zining yer maydoniga ekilgan don mahsulotlarini o‘rib-yig‘ib olishda ishtirok etayotganligidan norozi bo‘lgan holatlari mutlaqo mantiqqa ziddir”, — deyiladi tuman hokimligi axborot xizmati munosabatida.
Qarshi tuman hokimligining ma’lumot berishicha, fermer xo‘jaligi bilan 20 gektar maydondan 40 tonna hosil olishga kelishgan “Qarshi don agro” MJCh klaster fermerga 28 gektar yerni ag‘darish, ishlov berish uchun mablag‘ to‘lagan. Fermer esa buni rad etmoqda.
“Qanday qilib men bilan 20 gektar yerdan hosil olish uchun shartnoma tuzishadiyu, 28 gektar yerning xarajatini to‘laydi? Yoki klasterda shu darajada tushunmaydigan odamlar ishlaydimi?” — deydi fermer.
Hokimlik axborot xizmati rahbari To‘lqin Turdiyevning klaster mas’ullariga tayanib xabar berishicha, ayni kunga qadar ham g‘alla narxi belgilanmagan. Shartnomada ham g‘alla narxlari ko‘rsatilmagan.
“Klaster mas’ullari fermerni rozi qilamiz deyishyapti. Davlat narxiga 10 foiz qo‘shib berib, fermer bilan kelishishlarini aytdi”, — dedi To‘lqin Turdiyev.
Izoh (0)