Дунё ва ўзбек спортига оид 25 июнь тонгининг муҳим хабарлари дайжести билан танишинг.
Ўзбекистон
Ўзбекистон футзал миллий терма жамоаси 24 июнь куни Венесуэлага қарши ўртоқлик ўйинида иштирок этди. Учрашувда 3:3 ҳисобидаги жанговар дуранг қайд этилди. Ўзбекистонликлар сафида Дилшод Раҳматов дубль қайд этган бўлса, яна бир голга Акбар Усмонов муаллиф бўлди.
Мисрда бўлиб ўтаётган «Аrab Cup U-20» мусобақаси гуруҳ босқичи 2-турида Ўзбекистон U-18 терма жамоаси 24 июнь куни Тунисга қарши баҳс олиб борди. Унда тунисликлар минимал ҳисобдаги ғалабани қўлга киритди. Шу тариқа кетма-кет иккита ўйинни бой берган Элдор Магдиев шогирдлари плей-офф йўлланмасидан қуруқ қолди. Жамоа сўнгги турда 27 июнь куни Яманга қарши баҳс олиб боради.
Тошкентда ОЧЛ баҳслари
Осиё Чемпионлар Лигаси шарқ минтақасининг H ва I гуруҳида марказлашган тизимда ўтказилаётган гуруҳ босқичи старт олади. Эътиборлиси, бу учрашувларга Ўзбекистон мезбонлик қилади. 25 июнь кунига мўлжалланган «Тампинес Роверс» (Сингапур) ва «Гамба Осака» (Япония) ўртасидаги баҳсга «Локомотив» стадиони мезбонлик қилса, «Чианграй Юнайтед» (Таиланд) — «Чонбук Моторс» (Жанубий Корея) учрашуви «Бунёдкор» ўйингоҳида бўлиб ўтади.
Яна допинг билан боғлиқ можаро
Ўзбекистонлик самбо устаси Дилшод Чориевда допинг аниқлангани маълум бўлди. Ўз вақтида дзюдода Осиё чемпионати ва Осиё ўйинлари ғолибилигини қўлга киритган, Жаҳон чемпионати совриндорлари қаторидан жой олган Чориев 4 йилга спортга оид ҳар қандай фаолиятдан четлатилди.
Жаҳон
УЕФА «сафардаги гол» қоидасини бекор қилди. Эндиликда ЕЧЛ, Европа Лигаси ва УЕФА таснифидаги бошқа мусобақалар плей-офф босқичида бу қоида амал қилмайди.УЕФА таснифидаги мусобақаларда 1965/66 йилги мавсумдан бери амал қилиб келаётган бу қоидага кўра плей-офф босқичида икки ўйин ҳисоби тенг келиб қолса, сафарда энг кўп гол урган жамоа кейинги босқичга йўл оларди.
Али Даи Роналдуни табриклади
Терма жамоалар сафида гол уриш борасида Али Даининг рекордини такрорлаган Криштиану Роналду эронлик собиқ футболчидан табрик қабул қилиб олди.
Криштиану Роналду табригимни қабул қил. Бу рекорд Роналдуга тегишли бўлиши мен учун шараф. У инсонларни илҳомлантирадиган ва бутун дунё ҳаётига таъсир ўтказа оладиган буюк чемпион. Олға!Футбол қироли Пеле ҳам Роналдуни бу натижа билан муборакбод этди.Али Даи, собиқ футболчи
«Навбатдаги рекорд билан табриклайман. Сенга мухлислик қиламан!», — дея ёзади Пеле Instagram саҳифасида.
Франциянинг коинотдаги мухлиси
Франциялик космонавт Тома Песке коинотдан туриб Евро—2020 мусобақасини кузатаётгани тасвирланган суратни ижтимоий тармоққа жойлади.
«Франция — Португалия ўйинини кўряпман. Биз Еврода осон бўлмаган гуруҳда эдик, бироқ шу сабаб ўйинлар жуда қизиқарли бўлди», — дея ёзади Песке.
Франция терма жамоасида 2 та жароҳат
«Уч ранглилар» машғулоти вақтида Маркус Тюрам ва Тома Лемар жароҳат олди. Тюрам мушакларини шикастлаб олган бўлса, Лемар дарвозабон билан тўқнашиб кетиб, оёғидан жароҳат олган. Иккиси ҳам машғулотни эрта якунлаган, Лемарнинг жароҳати жиддий экани айтилмоқда.
«Уфа» Остон Ўрунов трансферидан воз кечди
Бу ҳақда уфаликлар бош директори Шамил Газизов маълум қилди. Унинг қайд этишича, томонлар тўлов муддатларини келиша олмаган ва шу сабаб «Уфа» футболчини трансфер қилиш вариантидан воз кечган. Аввалроқ «Уфа» Ўрунов трансфери учун 1 миллион евродан ошиқ маблағ тўлашга тайёр экани, бироқ бу пулни 2022 йилда учга бўлиб тўлай олиши айтилганди.
Ўрунов «Спартак» билан чет эл йиғинига бормайди ва мавсум олди тайёргарлик жараёнини ўринбосарлар таркиби билан ўтказади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)