Мбаппе билан шартнома имзолаган «ПСЖ», катта трансферлар арафасида турган Манчестер клублари ва ҳал қилувчи паллага кирган Евро—2020. Энг сўнгги спорт янгиликлари

Дунё ва ўзбек спортига оид 26 июнь тонгининг муҳим хабарлари дайжести билан танишинг.

Ўзбекистон

Футбол бўйича Суперлиганинг 11-тур учрашувлари 25 июнь куни старт олди. «Сўғдиёна» — «Локомотив» ва «Турон» — «Машъал» учрашувлари нурсиз дуранг билан якунланди. 26 июнь куни учрашувлар давом эттирилади. «Металлург» «Навбаҳор»га қарши баҳс олиб борса, «Қизилқум» «Бунёдкор»ни қабул қилади.

Шунингдек, Ўзбекистонда 25 июндан марказлашган тизимда ўтказилаётган ОЧЛ шарқий минтақаси иккита гуруҳидаги ўйинлар старт олди. Дастлабки кунда «Гамба Осака» «Тампинс Роверс»ни таслим этди (2:0), «Чонбук» эса «Чианграй Юнайтед»дан устун келди (2:1).

«2021 йилда Токио шаҳрида (Япония) бўлиб ўтадиган Олимпия ва Паралимпия ўйинларида Ўзбекистон спорт делегациясининг иштирокини таъминлаш ҳамда олимпия спорт турларини яна-да ривожлантириш чора-тадбирлари тўғрисида» Ўзбекистон Республикаси Президенти қарори эълон қилинди.

Жаҳон

Евро—2020 мусобақасининг 1/8 финал босқичи 26 июнь куни старт олади. Томошабинларни Уэльс — Дания ва Италия — Австрия учрашувлари кутиб турибди.

Gracenote портали Евро—2020 чемпионлигига фаворитлар ва финалнинг эҳтимолий иштирокчилари тахмин қилди.

Чемпионлик учун имконияти энг юқори жамоалар:

• Англия — 16,5%,
• Бельгия — 15%,
• Франция — 11,8%,
• Италия — 10,1%,
• Испания — 7,6%,
• Нидерландия — 7,6%.

Эҳтимолий финаллар:

• Бельгия — Англия: 7%,
• Франция — Англия: 5,9%,
• Италия — Англия: 5,2%,
• Испания — Англия: 4,3%,
• Бельгия — Нидерландия: 4,2%.

УЕФА Евро—2020 вақтида мусулмон футболчилар матбуот анжумани вақтида стол устида пивони кўришни истамаса, уни олиб қўяди. Бу ҳақда ташкилот ходими маълум қилди. Қайд этилишича, бу амалиёт Ҳеинекен компаниясини ташвишга солмайди ва улар бунга қарши эмас. Эслатиб ўтамиз, ҳомийлардан бири бўлган компаниянинг алкоголсиз пиво ичимлиги матбуот анжумани вақтида стол устида туради.

Жейдон Санчо «Манчестер Юнайтед»га ўтишга яқин. «Боруссия Д» ва инглиз клуби музокараларнинг сўнгги босқичида бўлиб турибди. Сўнгги деталлар ҳал бўлгач, шартнома имзоланади. Аввалроқ дортмундликлар Санчо учун 95 миллион евро талаб қилиши хабар қилинганди.

«Манчестер Сити» ҳам йирик трансфер устида ишламоқда. «Шаҳарликлар» «Астон Вилла» ярим ҳимоячиси Жек Грилиш трансфери бўйича келишувга эришгани хабар қилинмоқда. ESPN’га кўра, трансфер 100 миллион фунтга баҳоланган. Бу АПЛ рекорди ҳисобланади.

«ПСЖ» кичик Мбаппе билан шартнома имзолади. Парижликлар Килиан Мбеппенинг укаси Итан Мбаппе битим имзоланганини маълум қилди. 2006 йилда туғилган футболчи «ПСЖ» билан 2024 йилнинг ёзига қадар мўлжалланган келишув имзолади.

«Ювентус» яна Элдор Шомуродов билан қизиқмоқда. Николо Скиранинг хабар қилишича, туринликлар 25 ёшли ўзбекистонлик футболчи борасида «Женоа» вакиллари билан суҳбат олиб борган ва у ҳақида маълумот сўраган.