Janubiy Afrika Respublikasi (JAR) hukumati biryo‘la o‘n nafar farzandni dunyoga keltirgan ayolni topishga urinmoqda, ammo qidiruv ishlari hozircha natija bermayapti, deb yozadi  The South African.

Foto: African News Agency

Rekordni yangilagan onaning hikoyasi ommaviy axborot vositalari va ijtimoiy tarmoqlarda tarqaldi, ammo 9-iyun holatiga ko‘ra ayolning o‘zi ham, uning bolalari ham topilgani yo‘q.

“Hukumat OAV va ijtimoiy tarmoqlarda janubiy afrikalik ayol 10 nafar farzandni dunyoga keltirgani va dunyo rekordini yangilagani haqidagi xabarlarga e’tibor qaratdi. Chaqaloqlarni Gauteng provinsiyasida yashovchi Goziam Tamara Sitxol ismli ayol dunyoga keltirgani aytilmoqda. Hukumat mamlakat tibbiyot muassasalarida bunday tug‘ilish sodir bo‘lganini tasdiqlay olmaydi”, — dedi hukumatning jamoatchilik bilan aloqalar xizmati rahbari Fumla Uilyams.

Qayd etilishicha, ota-onalar madaniyat va an’analar nuqtayi nazaridan o‘zlarini oshkor qilishni xohlamayotgan bo‘lishi mumkin. Oilani qidirish ishlari davom etmoqda.

8-iyun kuni kechqurun 37 yoshli Goziam Tamara Sitxol Pretoriya kasalxonasida kesarcha kesish yo‘li bilan biryo‘la o‘nta farzand dunyoga keltirgani haqida xabar tarqaldi. Sitxolning eri Teboxo Sotezi Pretoria News’ga bergan intervyusida chaqaloqlar homiladorlikning 29-haftasida tug‘ilganini aytgan.

“Ular yetti o‘g‘il va uch qiz. Rafiqam yetti oy-u yetti kunlik homilador edi. Mening quvonchim cheksiz”, — degan bolalarning otasi.

Chakana savdo tarmog‘ida menejer bo‘lib ishlaydigan Sitxolning shundoq ham olti yoshli egizak farzandlari bor. Yil boshida shifokorlar unga oltita farzand kutayotganini aytganda Sitxol ularga ishonmagan. Keyinchalik skrining natijasida Sitxol sakkizta farzand kutayotgani aniqlangan.

“Men bunga ishonmadim. Ular ikki yoki uch nafar egizak ekaniga amin edim, xolos. Hatto rasmlarni ko‘rganimda ham ishonish qiyin edi. Ammo vaqt o‘tishi bilan bu haqiqat ekanini angladim. Kechalari uxlolmasdim”, — dedi Sitxolning o‘zi jurnalistlarga.

Sefako Makgato nomidagi sog‘liqni saqlash fanlari universiteti tibbiyot fakulteti rahbarining o‘rinbosari, professor Dini Mavela bu juda kam uchraydigan holat ekanini aytdi.

“Bu mutlaqo noyob holat. Shu bilan birga, o‘ta xavfli bo‘lgan qiyin vaziyat. Xavf shundaki, bachadonda chaqaloqlar uchun yetarli joy bo‘lmaganidan ularning jussasi juda kichik bo‘lishi mumkin. Chaqaloqlar qorinda uzoqroq tursa, ularning hayoti xavf ostida qoladi. Natijada bolalar erta tug‘iladi, tirik qolish ehtimoli pasayadi. Ammo hammasi Sitxol ularni qancha vaqt qornida ko‘tarib yurganiga bog‘liq”, — deydi Mavela.

Bolalar keyingi bir necha oyni inkubatorda o‘tkazishini qo‘shimcha qildi u.

Eslatib o‘tamiz, may oyining boshida Afrikaning Mali davlatida yashovchi ayol biryo‘la to‘qqizta farzand dunyoga keltirgan edi.

2020-yilning may oyida Fransiyada 30 yil ichida ilk bora olti egizak: besh qiz va bir nafar o‘g‘il bola dunyoga kelgan edi. Undan avval  Polshada birinchi marta olti egizak dunyoga kelgan. Egizaklar — to‘rt qiz va ikki o‘g‘il 20-may kuni Krakov universiteti kasalxonasida tug‘ilgandi.