Германиянинг Dekra ташкилоти 18 йил давомида 270 минг километр йўл босган Hyundai Getz’ни краш-тестдан ўтказди. Экспертлар автомобилнинг ишончлилигини текшириб, унинг хавфсизлик тизими, хусусан, эйрбег ва камарлари ишини баҳолади. Соатига 50 километр тезликда ҳаракатланиб, олд томони билан тўқнашган машинанинг натижаси кутилганидан яхши бўлиб чиқди, деб хабар беради Motor.
Фото: Autowееk.nl
Тўқнашувдан 17 миллисония ўтиб, хавфсизлик камарининг тортгичлари ишлаб кетган, яна икки миллисониядан кейин эса фронтал эйрбеглар қопқоғи очилган. Натижада барча тизимлар 37,9 миллисония ичида ишга тушган — таққослаш учун инсон кўзи, тахминан, 100 миллисония ичида пирпирайди.
Dekra мутахассислар эски Getz’нинг мустаҳкамлиги ва йиғилишини мақтаган: зарба оқибатида кузовнинг ҳаракатсиз объекти пачақланган бўлса-да, эшиклар ҳеч қандай қийинчиликларсиз очилган, узатмалар тепкилари ва олд устунлар бутунлигича қолган.
Фото: Autowееk.nl
Таъкидлаш керакки, замонавий автомобиллар оғирлиги бўйича салкам 20 йил олдин ишлаб чиқарилган ҳамёнбоп машиналарни сезиларли даражада ортда қолдиради, шу сабабли уларнинг ишончлилигини таққослаш қийин.
Шунга қарамай, хавфсизлик соҳасидаги экспертлар мунтазам эски ва янги автомобиллар ишончлилигини таққослаб келади. Масалан, 2020 йилда Швейцариянинг Динамик синовлар маркази BMW 525 ва 1983 йилги Fiat Uno’ни краш-тестдан ўтказган эди.
