22 июнь куни ижтимоий тармоқларда Самарқанд халқаро аэропортидан Россиянинг AzurAir авиакомпанияси Краснодар шаҳрига амалга ошириши керак бўлган махсус (чартер) авиақатнови кечиктирилгани ҳамда 300 нафардан ортиқ йўловчи овора бўлаётгани таъкидланган видеолавҳа тарқалди. «Самарқанд халқаро аэропорти» маъмурияти мазкур ҳолат бўйича расмий муносабат билдирди.
Таъкидланишича, ростдан ҳам 22 июнь куни эрталаб соат 09:00 да Самарқанд халқаро аэропорти орқали Россиянинг Краснодар шаҳрига махсус авиақатнов амалга оширилиши белгиланган. Мазкур қатновда 231 нафар йўловчи учиб кетиши керак бўлган. Бироқ АзурАир авиакомпанияси томонидан кун давомида авиақатнов вақти бир неча маротаба ортга сурилган. Бунинг сабаби ҳақида ҳали расмий маълумот берилгани йўқ.
Бу вақт давомида аэропорт ходимлари қатновни кутиб қолган йўловчиларга аэровокзалда мавжуд имкониятлардан келиб чиққан ҳолда хизмат кўрсатишда давом этган. Ўз навбатида AzurAir авиакомпанияси ҳам уларга тушлик ҳамда кечки овқатни ташкиллаштириб берган.
Самарқанд—Краснодар йўналишидаги махсус авиақатнов кечки соат 02:11 да амалга оширилган. Қатновга барча йўловчилар чиқарилган, рўйхатдан ўтиш ҳамда чегара назоратида муаммоли ҳолат кузатилмаган.
«‘Самарқанд халқаро аэропорти’ МЧЖ самолёт ҳамда йўловчиларга барча зарур хизматларни тақдим этади. Авиақатновларни қолдириш ёки вақтини кўчириш жамият ваколатига кирмайди», — дейилади хабарда.
Мавзуга доир: SkyUp Ўзбекистонга мунтазам авиақатновларга Украинадан рухсат олди. Энди Ўзбекистон томон рухсат бериши қолди
Изоҳ (0)