Самарқанд шаҳридаги «Боғибаланд» МФЙда жойлашган уйларда ёнғин содир бўлди, деб хабар беради ФВВ матбуот хизмати.
Маълум қилинишича, 22 июнь куни соат 00:52 да шаҳарнинг Хўжа Исоқ Валий кўчаси 1-уйда ёнғин содир бўлаётгани тўғрисида вилоят Фавқулодда вазиятлар бошқармасига хабар келиб тушган.
Мазкур хабарга асосан воқеа жойига 6 та ёнғин-қутқарув экипажи ва 1 та сув ташиш автомашинаси жалб этилган. Ҳодиса оқибатида уйнинг 248 квадрат метр майдонида том ва шифт қисми ҳамда қўшни уйнинг 30 квадрат метр майдонида том қисми ёнган.
Ёнғин соат 01:55 да ўраб олиниб, соат 02:53 да тўлиқ ўчирилган. Ёнғиндан уйларнинг тахминан 300 квадрат метр майдони сақлаб қолинган.
«Ёнғин оқибатида жабрланган ва ҳалок бўлганлар йўқ. Ҳозирда ёнғин сабаби ҳамда келтирилган моддий зарар миқдори аниқланмоқда», — дейилади хабарда.
Аввалроқ Самарқанддаги қабристонда ёнғин юзага келгани, Навоий вилоятидаги оҳак ишлаб чиқариш цехида ёнғин юз бериб, бир киши ҳалок бўлгани тўғрисида хабар берилганди.
Изоҳ (0)