25 июнь куни Олий Мажлис Сенатининг ўн олтинчи ялпи мажлиси бўлиб ўтади. Бу ҳақда Сенат Кенгаши томонидан 21 июнь куни бўлиб ўтган йиғилишда маълум қилинган, деб хабар беради парламент юқори палатаси матбуот хизмати.
Видеоконференцалоқа тарзида ўтказиладиган ялпи мажлисда Олий Мажлис Сенатининг давлат органларида очиқлик ва ошкораликни таъминлаш соҳасидаги фаолиятини такомиллаштириш, Сенатнинг Ахборот сиёсати ва давлат органларида очиқликни таъминлаш масалалари қўмитасини ташкил этиш каби қатор масалалар кўриб чиқилиши кутилмоқда.
Бундан ташқари, «Расмий статистика тўғрисида»ги, «Виждон эркинлиги ва диний ташкилотлар тўғрисида»ги, «Судлар тўғрисида»ги, « ‘Ўзбекистон Республикасининг давлат тили тўғрисидаги Ўзбекистон Республикаси қонунига ўзгартиш ва қўшимчалар киритиш ҳақида»ги, « ‘2021 йил учун Ўзбекистон Республикасининг Давлат бюджети тўғрисида’ги Ўзбекистон Республикаси қонунига ўзгартишлар киритиш ҳақида»ги, «Жиноий фаолиятдан олинган даромадларни легаллаштиришга қарши курашиш тартиби янада такомиллаштирилиши муносабати билан Ўзбекистоннинг айрим қонун ҳужжатларига ўзгартиш ва қўшимчалар киритиш тўғрисида»ги қонунлар муҳокама қилиниши назарда тутилган.
Шу билан бирга, Тошкент вилоятининг Оққўрғон, Оҳангарон, Бекобод, Бўстонлиқ, Бўка, Зангиота, Юқори Чирчиқ, Қибрай, Паркент, Пискент, Ўрта Чирчиқ, Янгийўл туманлари ва Олмалиқ, Чирчиқ, Ангрен, Янгийўл, Бекобод шаҳарлари чегараларини ўзгартириш тўғрисидаги масала кўриб чиқилиши режалаштирилган.
Қолаверса, қон донорлиги соҳасини ривожлантириш юзасидан кўрилаётган чоралар тўғрисида, оқава сув тозалаш иншоотларида вужудга келаётган муаммо ва камчиликларнинг атроф-муҳит ҳамда аҳоли саломатлигига таъсири юзасидан Вазирлар Маҳкамасига парламент сўровлари юбориш ҳақидаги масалалар кўриб чиқилиши назарда тутилган.
Шунингдек, 2030 йилгача бўлган даврда барқарор ривожланиш соҳасидаги миллий мақсад ва вазифаларда назарда тутилган инфратузилмани яратиш, саноатлашув ва инновацияларга кўмаклашиш мақсадига эришиш бўйича амалга оширилаётган ишлар юзасидан Вазирлар Маҳкамасига юборилган парламент сўрови натижалари ва бошқа масалалар муҳокама қилиниши режалаштирилган.
Бундан ташқари, Олий Мажлис Сенати ҳамда Хотин-қизлар муаммоларини тизимли равишда ҳал этиш бўйича Республика комиссияси томонидан маҳаллардаги ҳолат, аёлларнинг ҳуқуқ ва манфаатларини ҳимоя қилиш, тадбиркорликни қўллаб-қувватлаш, аҳоли бандлигини таъминлаш ва соҳага оид белгиланган чора-тадбирларнинг ижро этилиши бўйича ўтказилган ўрганиш натижалари кўриб чиқилиши назарда тутилмоқда.
Эслатиб ўтамиз, Олий Мажлис Сенатининг 15-ялпи мажлиси 28—29 май кунлари ўтказилган эди. Унда Сенат Президент Давлат хавфсизлиги хизмати тўғрисидаги қонунни маъқуллаган, Ўзбекистонда 2030 йилга қадар гендер тенгликка эришиш стратегиясини тасдиқлаган эди.
Изоҳ (0)