Бир вақтлар Франция терма жамоасининг келажаги сифатида эътироф этилган, бироқ Евро—2020 да французларга қарши ўйнаган Лоик Него ҳақида

2010 йил ёзи. 19 ёшли футболчилар ўртасида Европа чемпионати. Франция терма жамоасининг асосий ўнг қанот ҳимоячиси Лоик Него Антуан Гризманн билан меҳмонхонанинг бир хонасида яшарди. Иккаласи ҳам Испанияга қарши финалда майдонга тушди ва олтин медални қўлга киритди (2:1).

2021 йил ёзи. Венгрия терма жамоасининг ўнг қанот ҳимоячиси Лоик Него Евро—2020 да Антуан Гризманнга қарши ўйнади. Венгрияликлар Жаҳон чемпиони билан кутилмаганда дуранг ўйнади (1:1).

Бу қандай содир бўлди? Қандай қилиб Франциянинг ўнг қанот ҳимоячиси Венгрия таркибида майдонга тушди?

Франция термасидаги муваффақиятли ўйинидан кейин Него «Рома»га ўтди, Тотти унинг машинасини тузатиб берди. Лекин тез орада футболчи Венгриядан бошқа ҳеч кимга керак бўлмай қолди

Лоик 1991 йилда таваллуд топган. Унинг болалиги Гарж-ле-Гонесседа ўтган ва Франция терма жамоасининг бўлажак ҳужумчиси Виссам бен-Йеддер билан тез-тез алоқада бўлиб турган. Улар биргаликда ҳудудлараро футболда қатнашиб турарди.

Него «Нант» академиясига қабул қилинди ва фаолиятида дарҳол ўсиш кузатилди: ёшлар ўртасидаги Евро—2009 ярим финали, 2010 йилда олтин, 20 ёшлилар ўртасидаги 2011 йилги мундиал, «Нант» сафида дебют — футболчи учун буюк фаолиятнинг бошланиши эди. Шундан сўнг футболчи «Рома»га ўтди.

Римликларнинг асосий жамоасида Лоик майдонга тушмади (ўша вақтда энг эсда қоларли хотира: Франчесто Тотти ёш француз машғулотларга машинада келмаганини кўради. Него машинасини уриб олганини эшитади ва ундан калитни олиб, машинани устага топширади. Тотти Лоикка машинани идеал ҳолатда топширади).

«Рома»дан кейин «Стандарт» жамоаси Негонинг кейинги манзилига айланди. Ҳеч омади юришмаётган футболчига 2013 йилда Венгриянинг «Уйпешт» жамоасидан таклиф тушади.

«Бу жуда оғир вазият эди. Мен Франция, Италия, Бельгияда ўйнаганман, энди эса Венгриядан таклиф тушди. Лекин танловим йўқ эди, турмуш ўртоғим, фарзандим бор эди. Маошим камайишига рози бўлишга мажбур бўлдим. Оиламни боқишим керак эди, шунинг учун таклифни қабул қилдим. Аввалига ярим йил ўйнаганимдан кейин бу ердан кетаман деб ўйлагандим. Ҳаттоки ўзим билан бир чемодан нарса олдим, холос. Лекин барчаси ўйлаганимдек бўлмади. Бундан афсусланмайман».

2014 йил бошида Него «Чарлтон»га бориб келди ва шундан кейин 7 йил давомида Венгрияда тўп суриб келяпти. «Фехервар»да таянч зонада, ундан ташқари ўнг қанот ҳимоясида, ўнг қанот ярим ҳимоясида ва қанот ҳужумчиси сифатида ўйнади. 242 ўйинда 35 гол ва 33 голли узатмани ўз ҳисобига ёздириб қўйди.

Него жамоа учун Венгрия паспортини олишга рози бўлди. ФИФА қоидаларни ўзгартиргач, Евро унинг асосий мақсадига айланди

2017 йилда Венгрия паспорти бўйича биринчи суҳбат бўлиб ўтди.

Ҳужжатларни тайёрлашга «Фехервар» спорт директори ёрдамлашди. Бу клуб учун фойдали эди. Агарда жамоа доимий равишда 8 нафар венгриялик футболчини майдонга туширса Федерация томонидан бонусга эга бўларди. «Агар бу фойдали бўлса ҳеч қандай муаммо йўқ, деб жавоб бердим. Терма жамоа ҳақида ўйлаб ҳам кўрмагандим», — деди Него.

2020 йил кузда у терма жамоадан чақирув олди. Шундан буён Еврода иштирок этишни орзу қилади.

«Болалигимда кўрган Евро—2000 ёрқин хотиралар билан қолган. Мухлислар билан тўла стадионлар, даҳшатли атмосфера, босим, хурсандчилик, кўз ёшлар. Мана шулар учун ҳам футболчи бўлишни орзу қилганман. Ҳа, мен Франция таркибида Еврода қатнашмаяпман. Лекин афсусланмайман. Ўша пайтларда Франция терма жамоасига чақирилиш учун 0,1 фоиз имкониятим ҳам бўлмаган».

Него ҳозир 30 ёшда. Бу унинг фаолиятидаги биринчи ва охирги мусобақа бўлиши мумкин. Шунинг учун ўйинларга жиддий муносабатда бўляпти.

«Евро — бутун умр орзу қилган мусобақам. Фарзандларим мени футбол юлдузлари ёнида кўради. Ҳар бир ўйин Венгрия учун жуда муҳим. Биз Будапештда ўйнаймиз, мухлислар бу мусобақани ҳеч қачон эсдан чиқармайди. Венгрияни ўз уйимдек кўраман. Буни сўзлар билан ифодалаб бериш қийин. Францияда туғилган бўлсам ҳам, Венгрия ўз уйим каби. Бу ерда ҳамма менга меҳрибон. Фарзандларим Венгрияда улғаймоқда, уларнинг венгер дўстлари бор.

Албатта, Гризманн билан шунча йилдан кейин учрашиш ёқимли. Қачонлардир бир хонада яшаганмиз. Ажойиб даврлар эди. У бутун умр хотирамда қолади».

Него орзусига эришди. У Евро—2020 да иштирок этяпти. Мухлисларга тўла стадион, гол эйфорияси, Жаҳон Чемпиони билан дуранг натижа. Ҳис қилиш мумкин бўлган энг ёқимли лаҳзалар.