Россияда коронавирусга қарши эмланмаган давлат хизматчилари учун Москва вилояти ҳукумат биносига кириш тақиқланди. Бу ҳақда вилоят ҳукумати раисининг ўринбосари ва соғлиқни сақлаш вазири Светлана Стригункова маълум қилди.
«Биз ўзимиздан бошладик. Охирги олти ой ичида эмланмаган ёки (коронавирус билан) касалланган давлат хизматчилари ва бошқа ишчилар учун деярли бугундан бошлаб ҳукумат биносига кириш тақиқланди», — дея хабар қолдирди у коронавирусга қарши кураш бўйича Москва вилояти тезкор штабининг Telegram каналида.
21 июнь куни Подмосковьеда инфекция юқтириш бўйича 1811 та янги ҳолат аниқланди. Минтақа учун бу пандемия бошланганидан буён қайд этилган кунлик рекорд. Москва вилоятида касалхонага ётқизишлар сони ҳафтасига 40 фоизгача ўсиб бормоқда. Ҳудудда кунига ўртача мингдан ортиқ бемор касалхоналарга юборилмоқда.
Италияда ҳалигача коронавирусга қарши эмланмаган тиббиёт ходимлари ишдан четлаштирила бошланди. Вакцинациядан бош тортган тиббиёт ходимига ҳамкасблари ва беморлари билан алоқа талаб этилмайдиган бошқа иш таклиф қилиниши мумкин, аммо агар шундай иш ўрни мавжуд бўлса. Акс ҳолда бундай ходимлар 31 декабрга қадар иш ҳақисиз ишдан четлаштирилиши мумкин.Тегишли қоидалар 1 апрель куни Италия Вазирлар Кенгаши томонидан қабул қилинган коронавирусга қарши кураш тўғрисидаги фармонда келтирилган. Ҳужжат барча тиббиёт ходимлари учун мажбурий вакцинацияни назарда тутади. Ушбу масъулият давлат ва хусусий тиббий-ижтимоий тузилмаларда, шунингдек, дорихоналарда ишлайдиган соғлиқни сақлаш мутахассисларига тегишли.
Таъкидланишича, Италиядаги профессионал уюшмалар ва шифохоналар ушбу соҳадаги барча шифокорлар, ҳамширалар ва бошқа ишчиларнинг рўйхатини тақдим этган. Апрель ойида соғлиқни сақлаш идоралари уларнинг барчасига вакцинация ҳужжатлари, эмланишга келишни тасдиқлаш ёки вакцинадан воз кечишни қонунийлаштирадиган сабабларни тақдим этиш учун таклифнома юборган. Маълум бўлишича, таклифнома олганларнинг аксарияти вакцина олишга келмаган.
Мавзуга доир: Италияда коронавируснинг «нигерияча» штамми аниқланди
«Агар эмланишни истамасангиз, сизни ҳибсга оламан ва вакцина дозасини юбораман», — деган Филиппин президенти. «Сизлар зараркунандасиз, биз аллақачон азият чекяпмиз, сиз эса вазиятни оғирлаштиряпсиз. Мени нотўғри тушунманг, лекин мамлакатда вазият инқирозли, фавқулодда ҳолат ҳукм сурмоқда», — дейди у.
Жонс Ҳопкинс университети маълумотларига кўра, Филиппинда пандемия бошланганидан бери 1,4 миллион кишида COVID-19 қайд этилган. Коронавирус ташхиси қўйилган 23,7 минг киши вафот этган.
Изоҳ (0)