Huawei компанияси ўтган йили тақдим этилган MatePad T10 планшетининг болалар учун мослаштирилган Huawei MatePad T10 Kids Edition версиясини тақдим этди, деб хабар беради IXBT.
9,7 дюймли экранга эга бўлган модель силикондан ишланган зарбга бардошли махсус ғилоф ва шунга мос стилус билан жиҳозланган.
Махсус Kids Corner интерфейси болалар учун мўлжалланган дастурлар, функция ва контентдан фойдаланиш имкониятини беради. Шунингдек, болалар учун Azoomee сервисига йиллик обунани тақдим этади, у ерда махсус таълим дастурлари ва контентлар ўрин олган. Ота-оналар планшет ишини фарзандига мослаб созлай олади.
Агарда бола планшетни оғзига солмайдиган ва уни ерга ташламайдиган даражада етарлича катта ёшда бўлса, ғилофни ечиб қўйиб, қурилманинг стандарт созламаларидан фойдаланиш мумкин бўлади. Умуман олганда, катта ёшдаги болалар ва бутун оила учун ҳам қатор функциялар мавжуд.
Планшет HD сифатни қўллаб-қувватлайдиган 9,7 дюймли IPS экран, SoC Kirin 710А процессори, 2 гигабайт тезкор, 16/32 гигабайт ички хотирага, шунингдек, 2 ва 5 мегапикселли камераларга эга бўлган. Аккумулятор сиғими 5100 мА/соат. Қурилма 4G LTE, Wi-Fi, Bluetooth 5.0 ва GPS билан жиҳозланган. Google сервис ва дастурлари ўрнига Huawei’нинг муқобил сервисларидан, жумладан, AppGallery онлайн дастурлар дўконидан фойдаланилган.
Huawei MatePad T10 Kids Edition планшетининг нархи 200 долларни ташкил этади.
Аввалроқ Huawei компанияси HarmonyOS, учталик камера, 29 та антенна, 8 та динамик ва кенг сиғимли аккумуляторга эга планшетни тақдим этганди.
Изоҳ (0)