Янги Leitz Phone 1 смартфони бренднинг машҳур қизил нуқтаси бутун бошли смартфонга тааллуқли бўлган биринчи қурилмага айланди. Бунга қадар Leica ўз номини фақат турли қурилмалардаги камералар тизимига бериб келаётганди, деб хабар беради Hi-Tech.Mail.ru.
Таъкидланишича, смартфонни мобил суратга олиш соҳасидаги ютуқ деб аташ мумкин. Унга 20 мегапикселга эга бир дюймли сенсор ўрнатилган. Олдинлари бу каби модуллар фақат «совундон» деб аталувчи ихчам фотоаппаратларда бўлган. Шу билан бирга, қизиқ жиҳати Leitz Phone 1 қалинлиги бошқа замонавий смартфонларникидан фарқ қилмайди — 9,5 миллиметр.
Смартфоннинг яна бир ўзига хос жиҳати — бу унинг дисплейи. У Pro IGZO OLED номли янги авлод матрицасига эга бўлган бўлиб, у дисплейнинг динамик янгиланиш частотаси 1 герцдан 240 герцгача бўлишини, энг юқори ёрқинлик эса 2000 нитгача етишини таъминлайди. Auqos R6 каби смартфон Snapdragon 888 процессорида ишлайди, 12 гигабайт тезкор ва 256 гигабайт ички хотирага эга.
«Смартфон Sharp ва SoftBank билан ҳамкорликда фақатгина япон бозори учун ишлаб чиқарилган. Телефон ушбу мамлакатда 2021 йилнинг учинчи чорагида сотувга чиқади», — дейди Leica’нинг Россиядаги расмий вакили.
18 июндан бошлаб Leica Leitz Phone 1’ни 1700 доллар эвазига олдиндан буюртма қилиш мумкин.
Аввалроқ Sharp компанияси энг катта камерага эга смартфонни тақдим этгани, бир дюймли сенсорга эга камера яратишга Германияда премиум камераларни ишлаб чиқариш билан шуғулланувчи Leica компанияси ёрдам бергани маълум қилинганди.
Изоҳ (0)