Кучли ёмғирлар туфайли сув тошқини остида қолган Россия жанубидаги Керчь ва Ялта шаҳарларида (Қримда жойлашган) 1773 киши, шу жумладан, 321 нафар ёш бола эвакуация қилинди, деб ёзади «РБК» Фавқулодда вазиятлар вазирлигига таяниб.
Керчь ҳудудида 1492 киши (275 нафари болалар), Ялтада эса 281 киши (46 нафари болалар) эвакуация қилиниб, вақтинчалик бошпаналарга жойлаштирилган.
16 июндан 18 июнгача бўлган даврда 426 та уй олдидаги ҳудудлар сув остида қолган, шулардан 365 таси ҳовли-жойлар, 18 таси эса ижтимоий аҳамиятга эга объектлардир. Айни пайтда Керчь, Феодосия ва Ялта каби олтита муниципал ҳудудларда 64 та уй-жой сув остида қолмоқда.
Ялта ва Керчда электр таъминоти узилган. Айни пайтда Керчда электр узатиш қайта тикланган, аммо Ялтада кўплаб ҳудудлар электрсиз қолмоқда.
Аввалроқ Ялтада Водопадная дарёси кучли ёмғир туфайли қирғоқларидан тошиб кетгани туфайли шаҳарда фавқулодда вазият режими эълон қилинган эди. Тошқин оқибатида бир киши ҳалок бўлиб, 11 киши жабрланди. Шунингдек, транспорт ҳаракати ҳам тўхтаб қолган.
Керчда Жаржава ва Мелек-Чесме дарёлари тошиб кетди. Шаҳар маркази сув остида қолди. Аҳолидан овқат тайёрлаш учун кран сувидан фойдаланмаслик сўралди.
Изоҳ (0)