Дунё бўйлаб сув танқислиги ва қурғоқчиликдан зарарланиш COVID-19 пандемияси билан беллашиши мумкин. Бу ҳақда Бирлашган Миллатлар Ташкилоти (БМТ)нинг офатлар хавфини камайтириш бўйича махсус вакили Мами Мизутори айтиб ўтди, деб ёзади Reuters.
«Қурғоқчилик навбатдаги пандемияга айланиш арафасида ва уни даволаш учун вакцина йўқ», — деди Мизутори.
БМТ маълум қилишича, 1998 йилдан 2017 йилгача бўлган даврдаги қурғоқчилик камида 124 миллиард долларлик иқтисодий зарар етказиб, 1,5 миллиарддан ортиқ кишига таъсир қилган ва бу рақамлар ҳали «етарлича ҳисобланмаган бўлиши мумкин».
Ташкилот қайд этишича, ҳозирги кунга қадар глобал исиш Жанубий Европа ва Ғарбий Африкада қурғоқчиликни кучайтирди. Агар дунё чора кўрмаса, қурбонлар сони «осмонга чиқиши» мумкин. Ушбу асрда 130 га яқин мамлакатда қурғоқчилик хавфи юқори бўлиши мумкин.
«Қурғоқчилик худди пандемия сингари, одатда узоқ давом этади, кенг географик диапазонга эга ва келтирадиган зарари ҳам катта», — деди Мизутори. — «Бу билвосита озиқ-овқат танқислиги ва уларнинг нархи ошиши туфайли қурғоқчиликни бошдан кечираётган мамлакатларга таъсир қилиши мумкин».
Шу билан бирга, БМТ Африка, Марказий ва Жанубий Америка, Марказий Осиё, Жанубий Австралия, Жанубий Европа, Мексика ва АҚШда тез-тез ва оғир қурғоқчиликлар юз бериши кутилаётганини айтди.
БМТнинг чўлланиш билан курашиш учун масъул ходими Иброҳим Тяунинг сўзларига кўра, тупроқ деградациясига қисман ерлардан нотўғри фойдаланиш ҳам сабаб бўлади ва бу дунёни «борса келмас нуқтага» яқинлаштирди.
«Дунёнинг бошқа қисмларида содир бўлаётган ушбу ҳодиса сўзсиз Европада ҳам юз бериши мумкин«, — дея хулоса қилди у.
Изоҳ (0)