Афғонистондаги НАТО миссияси тугагандан сўнг Туркия ҳарбий кучлари Кобул аэропорти хавфсизлигини таъминлашда етакчи ролни эгаллайди. АҚШ ва Туркия президентлари Жо Байден ва Ражаб Тоййиб Эрдўғон шунга келишиб олди, деб ёзади «Интерфакс».
«Байден ва Эрдўғон бунга эришиш учун биргаликда ишлашга келишиб олди», — деди Байденнинг Миллий хавфсизлик бўйича маслаҳатчиси Жейк Салливан.
Аввалроқ Туркия мудофаа вазири Хулуси Акар АҚШ аскарлари Афғонистонни тарк этганидан сўнг Кобул аэропорти хавфсизлигини таъминлаш тўғрисида Анқаранинг таклифини эълон қилганди. Ўз навбатида, Афғонистондаги «Толибон» ҳаракати раҳбарияти Анқаранинг Кобул аэропортини қўриқлаш ҳақидаги таклифига қарши чиқиб, Туркиядан НАТОга аъзо бошқа мамлакатлар қаторида ўз қўшинларини Афғонистондан олиб чиқиб кетишни талаб қилган.
«Сўнгги 20 йил ичида Туркия НАТО кучлари таркибида бўлиб келди, шунинг учун улар 2020 йил 29 февралда АҚШ билан имзолаган келишувимизга мувофиқ Афғонистондан чиқиб кетиши керак», — деди «Толибон» вакили.
Эслатиб ўтамиз, апрель ойида АҚШ президенти Жо Байден Афғонистондан Америка қўшинларини олиб чиқиб кетиш бошланганини эълон қилган эди. Унинг сўзларига кўра, ҳарбийлар минтақада уларнинг олдига қўйилган барча мақсадларга эришган. Қуролли Кучларни 11 сентябргача тўлиқ чиқариб кетиш режалаштирилган. Америка ва НАТО мамлакатлари қўшинлари 29 апрелдан чиқиб кетишни бошлаган.
Изоҳ (0)