Ургутда «Жигули» ва Captiva ҳайдовчилари бир-бирига йўл бермаслиги оқибатида жанжал келиб чиқди. Икки киши жароҳатланди

Самарқанд вилояти Ургут туманида икки автомобиль ҳайдовчилари ва йўловчилари ўртасида низо чиқди, дея хабар бермоқда вилоят ИИБ матбуот хизмати.

Қайд этилишича, 2021 йилнинг 16 май куни соат 22:30 ларда Ургут тумани «Деҳқонобод» маҳалласида «ВАЗ 2106» ҳамда Captiva русумли автомашина ҳайдовчиларининг бир-бирига йўл бермаслиги оқибатида фуқаролар ўртасида келишмовчилик юзага келган.

Жанжалга автомашиналарда бўлган фуқаролар ҳам қўшилган. Жанжал оқибатида икки нафар фуқаро тан жароҳати олиб, Ургут тумани тиббиёт бирлашмасига мурожаат қилган.

Ҳозирда жабрланувчилар олган тан жароҳатларининг оғирлик даражасини аниқлаш мақсадида суд-тиббий экспертизаси тайинланиб, Ургут тумани бўйича ИИО ФМБ томонидан терговга қадар текширув ҳаракатлари олиб борилмоқда.

Бундан аввал Самарқандда йўловчи талашиб, жанжаллашган такси ҳайдовчиларига 5 суткадан қамоқ жазоси тайинлангани, Андижонда «тонировка»си учун тўхтатилган Nexia ҳайдовчиси ЙПХ инспектори билан жанжаллашгани ҳамда Тошкентда аёл эрига тегишли Spark’нинг ойналарини синдириб ташлагани ҳақида хабар берилганди.