Ўзбекистон Вазирлар Маҳкамаси қарори билан Ўзбекистонда ЮНЕСКО билан ҳамкорликда маданий мерос масалалари бўйича Халқаро маслаҳат қўмитаси ташкил этилди, деб хабар бермоқда «Дунё» АА.
Ҳужжатда Ўзбекистон Президентининг «Маданият ва санъат соҳасининг жамият ҳаётидаги ўрни ва таъсирини янада ошириш чора-тадбирлари тўғрисида»ги фармони ижросини таъминлаш, шунингдек, маданий меросни муҳофаза қилиш, асраш, оммалаштириш ва улардан оқилона фойдаланишда Ўзбекистон ва ЮНЕСКО ўртасидаги алоқаларни янада ривожлантириш вазифалари белгиланган.
Қўмита фаолиятининг асосий вазифалари жаҳон маданиятига муносиб ҳисса қўшган Ўзбекистоннинг маданий меросини Умумжаҳон мероси рўйхатига киритиш бўйича таклифлар тайёрлаш ва бу борада халқаро ташкилотлар ва ЮНЕСКО маслаҳатлашув органлари (ИКОМОС, ИККРОМ) билан ҳамкорликни кенгайтиришдан иборат.
Бундан ташқари, маслаҳат қўмитаси моддий маданий мерос объектлари ва Умумжаҳон мероси рўйхатига киритилган ҳудудлар (объектлар) муҳофазасини кучайтириш, уларнинг умумбашарий бемисл қимматини ишончли сақлаб қолиш бўйича илмий ва амалий таклифлар тайёрлаш, тегишли лойиҳаларни амалга ошириш билан боғлиқ ишларда қатнашади.
Халқаро маслаҳат қўмитаси ЮНЕСКО Умумжаҳон мероси қўмитаси қарорлари ва тавсияларининг Ўзбекистонда самарали амалга оширилишида иштирок этиш ҳамда бу борадаги миллий ҳисоботлар тайёрлашда ҳам амалий ёрдам кўрсатади.
Ҳукумат қарори билан Халқаро маслаҳат қўмитасига моддий маданий мерос масалалари ҳамда Умумжаҳон мероси рўйхатига киритилган ҳудудлар (объектлар) бўйича маслаҳат органи мақоми берилди.
Қўмита фаолияти харажатлари Ўзбекистон давлат бюджетининг Туризм ва спорт вазирлиги ҳузуридаги Маданий мерос агентлигига тақсимланадиган маблағлари доирасида молиялаштирилиши назарда тутилган.
Аввалроқ Ўзбекистонда маданий мерос муҳофазаси кучайтирилиши, Халқаро экспедиция Қорақалпоғистоннинг тарихий ёдгорликларини ўрганиб, уларни ЮНЕСКО бутунжаҳон маданий мероси рўйхатига киритиш стратегиясини ишлаб чиқиши ҳақида хабар берилган эди.
Изоҳ (0)