Самарқанд вилояти прокуратураси томонидан Самарқанд шаҳридаги «Минск» хиёбонида ноқонуний қурилиш ҳолати бўйича жиноят иши қўзғатилди, деб хабар қилди «Gazeta.uz» прокуратура матбуот хизматига таяниб.
Вилоят ҳокимлиги прокуратура органларига Самарқанд шаҳрининг Минск кўчасида «Таунхаус» услубидаги уй-жойлар, болалар боғчаси ва савдо биноларини қуриш учун рухсатномалар ҳолати тўғрисидаги ҳужжатларни тақдим этди.
Ҳужжатларни ўрганиш натижаларига кўра, прокуратура Жиноят кодексининг тегишли моддаларига биноан қурилиш учун рухсатнома асосида ҳужжатларни қалбакилаштириш бўйича жиноят иши қўзғатди.
Нима бўлганди?
«Я — Самаркандец» гуруҳидаги хабарда ёзилишича, самарқандликлар ҳокимнинг 2020 йил 27 октябрдаги қарори билан 1,77 гектар майдонда «Таунхаус» услубидаги икки қаватли турар жой бинолари, болалар боғчаси ва савдо биноларини қуришни бошлаган «Меҳр нур омад барака» компаниясининг хатти-ҳаракатлари тўғрисида бир неча бор ҳокимият, прокуратура, вилоят бош архитекторига мурожаат қилган.
Самарқанд шаҳар кенгаши депутати Шоҳрухбек Алибековнинг маълум қилишича, шаҳарда учта хиёбон бор — «Университет хиёбони», Самарқанд давлат архитектура-қурилиш институти олдидаги хиёбон ва «Минск» хиёбони.
Унинг сўзларига кўра, қурувчи компания ноқонуний равишда қурилиш ишларини олиб бормоқда. Компания қурилиш учун асос сифатида «ТошкентбошпланЛИТИ» ДУК хулосасини кўрсатди, аммо фаоллар ва депутат институтга қилинган сўров орқали ҳужжатнинг ҳақиқий эмаслигини аниқлашга муваффақ бўлди. Қурувчи компанияга тақдим этилган иккинчи «ТошкентбошпланЛИТИ» ҳужжати ҳам бекор қилинди.
Хусусан, «ТошкентбошпланЛИТИ» 2020 йил ноябрь ойи охирида Самарқанд вилояти бош архитекторининг хатига жавобан, шаҳарнинг бош режасига биноан «хиёбон сақланиб қолгани ва уни қайта тиклаш ҳамда ободонлаштириш ишлари олиб борилиши кераклигини маълум қилган».
«Ҳудуд бинонинг қурилишига мўлжалланмаган. Хиёбон бўйидаги йўллар аҳолига қулайлик яратиш мақсадида коммунал тармоқлар ва пиёдалар йўллари қурилишига мослаштирилмоқда. Шунингдек, институтга кўриб чиқилаётган ҳудудда бирон-бир объектни жойлаштириш учун ҳужжат келиб тушмагани тўғрисида маълум қиламиз», — дейилади хатда.
Самарқанд вилояти Қурилиш бош бошқармаси бошлиғи Лазиз Ҳамидов 2 март куни ёзган хатида қурилишни дарҳол тўхтатиб қўйишни талаб қилиб, «Меҳр нур омад барака» компанияси директори, Самарқанд вилояти ҳокимининг ўринбосари, Самарқанд ҳокими ва Самарқанд шаҳар прокуратурасига хатлар юборган.
Лазиз Ҳамидов бир ой ўтгач огоҳлантиришга қарамай, қурилиш ишлари давом этаётгани ва бу фуқароларнинг норозилигига сабаб бўлаётганини таъкидлади. У Самарқанд ҳокими ва шаҳар прокуратурасидан қурилишни тўхтатишда амалий ёрдам кўрсатишни ва тегишли чораларни кўришни илтимос қилди.
Блогер Тимур Сатторов 9 июнь куни «Минск» хиёбони сақлаб қолиш масаласи олти ой давомида кўтарилганини маълум қилди. Мазкур ҳудудда истиқомат қилувчилардан бирининг айтишича, май ойи охирида вилоят ҳокими Эркинжон Турдимов маҳаллага ташриф буюрган ва хиёбон ёнидаги ҳудудда қурилиш ишларини тўхтатишга буйруқ берган. Қисқа танаффусдан сўнг қурувчи компания яна қайта иш бошлади.
Натижада прокуратура жиноий иш қўзғатди.
Бундан аввал Ўзбекистонда сўнгги ўн йилда қурилиш ишлари ҳажми 10 баравардан зиёдроққа ошгани, Фарғонада 12 та қурилиш объектида аниқланган камчиликлар юзасидан ишлар судга оширилгани ҳамда Тошкент вилоятида қарийб 160 гектар ер ноқонуний ўзлаштириб олингани аниқлангани ҳақида хабар берилганди.
Изоҳ (0)