Москва ва Москва вилояти ҳокимияти мажбурий оммавий вакцинацияни бошлаш ҳақида эълон қилди. Тегишли қарорлар икки минтақанинг бош санитария шифокорлари томонидан имзоланган, деб ёзади Meduza.
Хабарга кўра, давлат ва хусусий ташкилотларнинг қуйидаги соҳаларида ишлайдиган ходимлар коронавирусга қарши вакцина билан мажбурий эмланиши керак:
- савдо;
- фитнес клублари ва гўзаллик салонлари;
- умумий овқатланиш;
- маиший хизматлар (кир ювиш, кимёвий тозалаш воситалари);
- жамоат транспорти ва таксилар;
- таълим, соғлиқни сақлаш ва ижтимоий ҳимоя;
- уй-жой коммунал хўжалиги ва электротехника;
- оммавий спорт тадбирлари;
- маданий тадбирлар (шу жумладан музейлар ва кутубхоналар);
- кўнгилочар тадбирлар.
Таъкидланишича, юқоридаги ташкилотларнинг раҳбарлари 15 июлгача ўз ходимларининг камида 60 фоизини коронавирусга қарши вакцинанинг биринчи дозаси билан эмлашни ташкил қилиши лозим. 15 августга қадар эса жами ходимларнинг камида 60 фоизи иккинчи доза билан эмланиб бўлиши керак. Фақатгина эмланмаслик тўғрисида тиббий кўрсатмага эга кишилар вакцина олмаслиги мумкин.
Москва мэри Сергей Собянин қарорни изоҳлар экан, эмланиш ҳар кимнинг шахсий иши эканини, аммо жамоат орасида юрадиганлар ўзлари истамаган ҳолда эпидемиологик жараённинг шеригига айланиб қолишини айтди.
«Агар сиз беҳисоб одамларга хизмат кўрсатадиган ташкилотда ишласангиз, эпидемия ҳолатида қандай турдаги шахсий ҳимоя воситаларидан фойдаланишингиздан қатъи назар, бу (вакцинация) энди сизнинг шахсий ишингиз эмас», — деди Собянин.
Шаҳар савдо ва хизмат кўрсатиш бўлими бошлиғи Алексей Немерюкнинг таъкидлашича, мажбурий эмлаш масаласи бизнес билан муҳокама қилинган ва кўплаб тадбиркорлар «ўзлари ушбу ечимни таклиф қилган».
«Интерфакс»нинг ҳукуматдаги манбаси хабар беришича, мамлакат бўйлаб мажбурий вакцинация ҳали режалаштирилмаган. «Бу масала ҳар бир минтақадаги эпидемиологик вазиятга қараб ҳал қилинади», — дейди агентлик манбаси.
«Мажбурий вакцинация ҳали жорий қилинмаган, бу ҳақда бирор гап ҳам йўқ», — деди ўз навбатида президент матбуот котиби Дмитрий Песков.
Россияда сўнгги икки ҳафта ичида коронавирус билан касалланишнинг кескин ўсиши кузатилди: май ойи охирида ҳар куни тўққиз мингга яқин кишида инфекция қайд этилди, июнь ўрталарига келиб бу рақам 13-14 мингга етди.
Москвада ушбу даврда касалланиш даражаси икки бараварга ошди. Шаҳарда коронавирусга чалинганлар кўпайиб кетгани сабабли янги чекловлар киритилди. Москва мэри Сергей Собянин 2021 йил 15 июндан 19 июнгача иш ҳақи сақланиб қолган ҳолда, шаҳарда дам олиш кунлари деб эълон қилди. Сергей Собянин маълум қилишича, Москвада коронавирус инфекциясининг тарқалиши билан боғлиқ вазиятнинг мураккаблашиши сабабли шаҳар касалхоналарида минглаб койкалар коронавирус беморларига мослаштирилмоқда.
Москва ортидан Санкт-Петербург ҳам 17 июндан COVID-19 чекловларини кучайтирмоқда.
Изоҳ (0)