Хитойнинг «Тайшан» АЭСда радиация даражаси ошгани маълум қилинди

Хитойнинг «Тайшан» атом электр станцияси(АЭС)да ёнилғи стерженларининг шикастланиши сабабли радиация даражаси ошди. Бу ҳақда Global Times хабар берди.

Хитой Атроф-муҳитни муҳофаза қилиш вазирлигининг маълумотларига кўра, 1-энергия блокининг биринчи контурида кузатилган радиация даражаси кўтарилишининг асосий сабаби шундаки, энергия блокларининг ишлаши давомида ёнилғи ишлаб чиқариш, ташиш, юклаш ва бошқа назоратдан ташқари омиллар туфайли ёнилғи стерженларида кичик шикастланиш юзага келган.

Таъкидланишича, ҳозирги вақтда 1-энергия блокидаги биринчи контур иссиқлик ташувчисида радиоактивлик даражасининг ошиши қайд этилган. Шунга қарамай, АЭС техник регламентда белгиланган меъёр бўйича ишламоқда.

Аввалроқ Япония ҳукумати ХХР расмийларидан АЭСдан радиоактив инерт газлар чиқиши мумкинлиги ҳақидаги хабарлар билан боғлиқ вазият ҳақида маълумот сўраган эди. Япония мазкур хабарлардан чуқур хавотир билдириб, Хитойга шаффофлик руҳидаги маълумот билан таъминлаш тўғрисида илтимоснома юборган. Айни пайтда Токио вазият юзасидан Пекиннинг изоҳини кутмоқда.

Шу билан бирга, Япониядаги радиацияни кузатиш станциялари ушбу босқичда ҳеч қандай ўзгаришларни қайд этмаган.

«Тайшан» атом электр станцияси Хитой жанубидаги Гуандун вилоятида, Гонконг яқинидаги Жанубий Хитой денгизи соҳилида жойлашган. АЭС таркибида Франциянинг Арева компанияси томонидан ишлаб чиқарилган қуввати 1750 МВт бўлган иккита энергия блоки бор. Улар 2018 ва 2019 йилларда тижорий мақсадда фойдаланишга топширилган.

14 июнь куни CNN хабар беришича, АҚШ ҳукумати бир ҳафта давомида Хитойнинг «Тайшан» АЭСдан радиация нурлари сизиб чиқиши эҳтимолини баҳолаган. Хабарга кўра, АЭС пудратчиларидан бири — Франциянинг Framatome компанияси АҚШ расмийларига ушбу объектдаги «муқаррар радиация хавфи» ҳақида маълум қилган.