Бухоро вилоятида 2004 йили ишдан бўшатилган сохта ИИБ ходими аниқланди, дея хабар берди «Дарё» мухбири.
Қайд этилишича, ўз автомашинасида йўл ҳаракати қоидасини бузиб, ЙПХ ходими томонидан тўхтатилган Ў.С. ўзини ички ишлар органларида узоқ йиллар хизмат қилиб, сўнгра нафақага чиққан майор сифатида таништиради ва йўл патруль хизмати инспекторига 2014 йил 23 майда Ўзбекистон ИИВ МИБ раҳбари томонидан берилган, 3817 гувоҳномани кўрсатади.
ЙПХ ходими ушбу гувоҳноманинг ҳақиқийлигига шубҳа қилиб, ҳужжатни архивдан текшириш учун вилоят Ички ишлар бошқармасига билдирган. Ҳолат юзасидан ўтказилган тезкор-суриштирув ҳаракатлари давомида бундай гувоҳнома йўқлиги маълум бўлган.
Ўрганишлар давомида Ў.С.нинг 2004 йилдан буён «Агробанк» Қоракўл тумани филиалида юрист-консулт вазифасида ишлаб келаётгани аниқланган.
Шунингдек, суриштирув ҳаракатлари давомида Ў.С.нинг ҳақиқатан ҳам 1998–2004 йиллар мобайнида вилоят ички ишлар органларининг турли вазифаларида хизмат қилгани ва 2004 йилда хизматга нолойиқ хатти-ҳаракатлари сабаб ишдан бўшатилгани ҳам ойдинлашган.
Ҳозирда фуқаро Ў.С.га нисбатан терговга қадар текширув ҳаракатлари олиб борилмоқда.
Бундан аввал Тошкентда МИБ ходими икки йилда 596 млн сўмни ўзлаштириб юборгани маълум бўлгани, Бухорода сохта Миллий гвардия ходими қўлга олингани ҳамда Бухорода марҳум Ўктам Барноевнинг сохта жияни 5 йил 6 ой муддатга қамалгани ҳақида хабар берилганди.
Изоҳ (0)