Наманганда вояга етмаган қизига тегажоғлик қилмоқчи бўлган эрини болта билан уриб ўлдирган аёлга суд ҳукми ўқилди. Бу ҳақда «Халқ сўзи online» хабар берди.
Маълум қилинишича, судланувчи аёл Р.Х. 2006 йилда фуқаро А.К. билан танишиб, у билан шаръий никоҳдан ўтган ҳолда яшаб келган. Оилада фарзанд туғилгандан сўнг 2010 йилда никоҳ расмийлаштирилган.
2021 йилнинг 31 январидан 1 февралга ўтар кечаси А.К. спиртли ичимликдан маст ҳолда уйга келиб, яшаш хонасида ухлаб ётган 2010 йилда туғилган қизи, вояга етмаган Б.Г.нинг кийимларини ечиб, тегажоғлик қилмоқчи бўлган. Шу пайт кичик фарзандининг йиғисидан уйғониб кетган хотини ундан нима қилаётганини сўраганида эр носқовоғини қидираётганини айтиб, яна жойига ётиб олган.
Бундан қаттиқ таъсирланган Р.Х. ғазабланиб, спиртли ичимлик таъсирида ухлаб қолган эрининг ожиз аҳволдалигидан фойдаланиб, ҳовлида бўлган болта билан унинг бош соҳасига бир неча маротаба уриб, қасддан ўлдирган.
Содир этган жинояти изларини яшириш мақсадида унинг мурдасини яшаш уйидаги фойдаланилмай келинаётган хонага олиб кириб, уч кун сақлаган. 3 февраль куни тунги соат 03:30 ларда жасадни ҳовлидаги бодом дарахтининг олдига судраб олиб чиқиб, қон тегган гилам ва матоларни бошқа хонага олиб кириб, яшириб қўйган.
Шундан кейин қўшни уйда яшовчи қайнакаси Қ.А.га бодом дарахти тагида кимдир ётганини айтиб, уни уйидан чақириб чиққан. Қ.А. дарахт тагига бориб қўл телефони ёруғида укасининг ўлиб ётганини кўргач, тез тиббий ёрдамга қўнғироқ қилган.
Дастлаб Р.Х. турмуш ўртоғини ўлдириб қўйганини айтмасдан, гўёки марҳум ўз эҳтиётсизлиги сабабли вафот этгандай қилиб кўрсатган. Орадан 2-3 соат вақт ўтгач, ИИБ ходимлари келиб, қайтадан суҳбатлашганда бўлган ҳолатни очиқ-ойдин сўзлаб берган. Шундан кейин унга нисбатан Жиноят иши очилиб, тергов ҳаракатлари олиб борилган.
Ушбу жиноят ишини кўриб чиққан вилоят суди аёлга нисбатан Жиноят кодексининг тегишли моддалари билан 10 йил-у 6 ой муддатга озодликдан маҳрум этиш жазосини тайинлаган.
Мавзуга доир:
Изоҳ (0)