15 июнь куни Тошкент шаҳар ҳокимлигида Халқ депутатлари Бектемир тумани кенгашининг навбатдан ташқари 39-сессияси бўлиб ўтди. Бу ҳақда ҳокимлик матбуот хизмати хабар берди.
Маълум қилинишича, сессияда Бектемир туманига янги ҳоким тайинлаш масаласи кўриб чиқилган.
Сессияда ҳозиргача Фавқулодда вазиятлар вазирлигининг Фавқулодда вазиятларнинг олдини олиш ва уларда ҳаракат қилиш давлат тизими ҳамда Фуқаро муҳофазасининг ташкилий таъминоти ва режалаштириш бош бошқармаси бошлиғи бўлиб ишлаган Тапил Маҳамадзияев Бектемир тумани ҳокимлигига тасдиқланган.
Маълумот учун, Тапил Маҳамадзияев 1976 йилда Тошкент вилоятида туғилган. Маълумоти олий.
Эслатиб ўтамиз, Бектемир тумани ҳокими вазифасида ишлаб келган Жаҳонгир Иброҳимов 2021 йилнинг 15 январида Юнусобод туманига ҳоким этиб тайинланганди. Шундан буён ушбу лавозим февралга қадар вакант бўлиб келган ва 11 февралда Савдо-саноат палатаси Тошкент шаҳар ҳудудий бошқармаси бошлиғи бўлиб ишлаган Саиджамол Султонов туман ҳокимлигига тасдиқланган эди.
Изоҳ (0)