Ким Чен Ин Жанубий Корея мусиқа ва фильмларига қарши уруш эълон қилди. «Кей-поп»ни тинглаган шимолий кореяликларни меҳнат лагерларида 15 йиллик жазо кутмоқда

Шимолий Корея раҳбари Ким Чен Ин «кей-поп»ни (Жанубий Корея мусиқий жанри) «хавфли ўсимта« деб атади. Мамлакатда Жанубий Корея фильмларини томоша қилган ва мусиқаларини тинглаганлар учун жазо кучайтириладиган бўлди. Бу ҳақда The New York Times (NYT)нинг Жанубий Корея бюроси бошлиғи Чхве Санг-хун Хунга таяниб, Meduza хабар берди.

Чхве Санг-хуннинг таъкидлашича, Шимолий Корея ўтган йиллар давомида Жанубий Кореядаги ҳаёт машаққатлари акс этган тарғиботларни илгари сурган. Аммо КХДРга Хитой орқали ноқонуний кириб келаётган Жанубий Корея фильмлари ва видеоклиплари ушбу тасвирга путур етказмоқда. Улар коронавирус пандемияси туфайли ўрнатилган карантин чоралари фонида оммалаша бошлади. Сўнгги ойларда КХДР расмийлари деярли ҳар куни Жанубий Корея фильмлари, мусиқалари ва видеоклипларининг «антисоциалистик» таъсири ҳақида гапирмоқда, деб ёзади NYT.

2020 йил декабрида Шимолий Корея Жанубий Корея мусиқаларини тинглайдиган, фильмларини томоша қиладиган, китобларини ўқийдиганларга қарши қонунларни кучайтирди. Қонунбузарлар меҳнат лагерларида 5 йилдан 15 йилгача жазо ўтайдиган бўлди. Бундай материалларни тарқатганлар ҳатто ўлим жазосига тортилади, деб хабар беради NYT Жанубий Корея махсус хизматининг маълумотларига асосланиб. Daily NK нашрининг 2021 йил май ойида ёзишича, КХДР фуқароси Жанубий Корея видеороликлари ёзилган CD ва USB дискларини ноқонуний сотгани учун қатл этилган.

Ким Чен Ин КХДРда Жанубий Корея маданияти тарқала бошлагани ҳақида илгари бир неча бор гапирган. Хусусан, 2021 йил апрель ойида у ёш шимолий кореяликларнинг «мафкуравий ва психологик ҳолатида катта ўзгаришлар» юз бераётганидан огоҳлантирди. «Ким Чен Иннинг наздида Жанубий Кореядан келаётган маданий босим меъёрдан ошиб кетди», — дейди Япониянинг Asia Press International бош муҳаррири Зиро Ишимару NYT’га.

Asia Press International хабарига кўра, ёш шимолий кореяликларнинг компьютерлари, телефонлари ва мусиқа плеерларида Жанубий Корея контентлари бор-йўқлиги текширила бошланди. Бундан ташқари, мамлакатда «жанубий кореяча услубда» сўзлаш ва ёзиш тақиқланган. Хусусан, Ким Чен Ин Жанубий Кореядаги аёллар ўзларининг севгилиси ёки дўстларига мурожаат қилганда ишлатадиган «оппа» (ака) сўзини қўллашни қоралади. Бунинг ўрнига шимолий кореяликларга жуфтлари ҳақида гап кетганда «ўртоқ» сўзидан фойдаланиш тавсия этилади.

Daily NK хабарига кўра, Шимолий Корея Жанубий Корея билан бир қаторда Япония ва Америка маданиятига қарши курашмоқда. Бироқ ҳамиша шундай бўлиб келмаган: 2010 йилларда Шимолий Корея телевидениеси Микки ва Минни Маус кийимидаги персонажларни намойиш этар, Disney’нинг «Қирол шер» ва «Золушка» мультфильмлари туширилган дисклар киоскаларда сотиларди. Ресторанларда чет эл фильмлари, концертлари ва теледастурларини томоша қилиш мумкин эди.

Ким Чен Иннинг маданий сиёсатидаги бурилиш унинг 2019 йил февраль ойида ўша пайтдаги АҚШ президенти Дональд Трамп билан муваффақиятсиз кечган музокараларидан сўнг юз берди. Ўшанда Шимолий Корея ядровий қуролсизланишдан бош тортди, АҚШ эса санкцияларини бекор қилмайдиган бўлди. Шундан сўнг Ким Чен Ин КХДР ташқи дунё билан савдо-сотиқдан мустақил равишда «ўзини ўзи таъминлайдиган иқтисодиёт» қуришини эълон қилди. Кўп ўтмай пандемия бошланди, бу КХДРнинг жиддий иқтисодий муаммоларини янада кучайтирди, деб қайд этади NYT.

«Шимолий Кореянинг иқтисодий аҳволи Ким Чен Ин ўн йил олдин ҳокимият тепасига келганидан буён энг ёмон ҳолатда. Ижтимоий тартибсизликларнинг олдини олиш учун у назоратни кучайтириши керак», — деди Зиро Ишимару NYT нашрига.