Андижонда она боласини калтаклаб, тиланчилик қилишга мажбурлаб келгани тўғрисида видео тарқалгани хабар берилганди. Ушбу ҳолат юзасидан Андижон туман прокуратураси «Дарё»га қўшимча маълумот тақдим этди.
Қайд этилишича, Андижон вилояти Халқ таълими бошқармасининг 2021 йил 12 июнида Андижон туман ички ишлар бўлимига юборган 08/19-1463-сонли хатига кўра, вояга етмаган Т.Қ. муқаддам Андижон тумани, «Хўжа» МФЙ, Тожик кўчасида яшаган онаси 1993 йил 13 майда туғилган Т.Г. томонидан мунтазам уриб, калтакланиб келаётгани юзасидан ижтимоий тармоқлар орқали хабарлар аниқлангани ҳамда ушбу ҳолат юзасидан текширув ҳаракатларини ўтказиш сўралган.
Ўтказилган суриштирувда Андижон тумани «Хўжа» МФЙ раиси Т.Ў. фуқаро Т.Г. ушбу маҳаллада яшамаслигини маълум қилиб, ушбу ҳолатни тасдиқловчи далолатномани тақдим этган.
Ўтказилган суриштирув ва тезкор тадбирлар давомида Т.Г. томонидан Андижон тумани ҳудудида бирон-бир ҳуқуқбузарлик содир этилмагани ҳамда ушбу фуқаролар доимий (муқим) яшаш жойига эга эмаслиги, одатда Андижон шаҳрида жойлашган турли чиқинди қабул қилиш ва саралаш учун мўлжалланган жойларда яшаб келгани аниқланиб, бирламчи ҳужжатлар расмийлаштирилган.
Вояга етмаган Т.Қ. ҳозирда Андижон вилояти тери-таносил касалликлари шифохонасида соғлиғини тиклаш мақсадида даволаниб келаётгани аниқланиб, шифокорлар томонидан унинг руҳий ҳолатини инобатга олган ҳолда ҳозирда тушунтирув олиш ва текширувга жалб этиш тавсия этилмаган. Иш ҳолатларидан келиб чиққан ҳолда вояга етмаган Т.Қ.дан психолог ва педагог иштирокида кейинчалик тушунтириш олиш мақсадга мувофиқ деб топилган.
Вояга етмаган Т.Қ.нинг баданида тан жароҳатлари ёки унинг излари мавжудлигига аниқлик киритиш мақсадида суд-тиббий экспертизаси тайинланиб, эксперт томонидан шифохонада кўрув ўтказилган.
Эксперт А.Й.нинг 13 июндаги дастлабки хулосасида вояга етмаган Т.Қ.нинг баданида юз, бурун оғиз тешиги атрофида тери касаллиги, бош қисмида кўплаб оч пушти рангли тери бутунлиги бузилгандан сўнг чандиқлар ҳамда киндик соҳаси тешиги юзасида катта юзали қизғиш рангли доғлар, ўнг думба юзаси ташқи квадратидаги қон талаш ва ўнг тирсак бўғими ташқи юзасида шилинма жароҳатлар мавжудлиги, касаллик тарихи ҳужжатларини ўрганиш якунлари бўйича эксперт хулосаси тайёрланиши қайд этилган.
Ушбу ҳолатга алоқадор шахсларни, шу жумладан, Т.Г. турган жойини аниқлаш ва ҳолат юзасидан кечиктириб бўлмас суриштирув ҳаракатларини ўтказиш учун тўпланган ҳужжатлар ҳудудий жиҳатдан тегишлилиги бўйича суриштирувни давом эттириш учун Андижон шаҳар ИИО ва ФМБга юборилган.
Ҳозирда мазкур ҳолат юзасидан терговга қадар текширув ҳаракатлари шаҳар прокуратураси томонидан назоратга олинган ҳолда шаҳар ИИОФМБ томонидан олиб борилмоқда.
Изоҳ (0)