Бухоро вилоятининг Олот туманида мактаб ўқувчиси сувга чўкиб вафот этгани ва унинг жасади бир кундан сўнг топилгани ҳақида хабар берилган эди. Олот туман халқ таълими бўлими бошлиғи Фаррух Кўмаковнинг «Дарё»га маълум қилишича, 13 июнь куни айнан шу тумандаги 16-мактабнинг 8-синфини тугатган ўқувчи ҳам сувга чўкиб вафот этган.
«Шайхлар» МФЙ раиси Бобомурод Севинчовга кўра, шу маҳаллада яшовчи 14 ёшли Ф.Н. 13 июнь куни, тахминан, соат 11:30 да онасига «ўт-хашак йиғиб келаман», деб уйидан чиқиб кетган ва маҳалладошлари А.Н., Б.И. ҳамда Э.Э. билан «Кесакли» маҳалласи ҳудудидаги катта ҳовуз сувига чўмилишга борган.Қайд этилишича, кун иссиғида совуқ сувга сакраган Ф.Н. сувда ўзини бошқаролмай чўка бошлаган. Шериклари уни қутқаришга ҳаракат қилган бўлса-да, Ф.Н.ни сувдан олиб чиқишга куч топа олмаган. Болалар шовқин кўтариб, маҳалла аҳолисини чақира бошлаган. Одамлар тўпланиб, бир неча киши болани қутқариш учун ўзини ҳовузга ташлаган.
«Ушбу ҳовуз Аму-Бухоро катта каналидан келиб тушадиган сувларни тиндиришга мослаштирилган бўлиб, кенглиги, тахминан, 15х20 ҳажмли, чуқурлиги 2,5—3 метрни ташкил этувчи сув омбори ҳисобланади. Маҳаллий аҳоли буни ‘ҳовуз’ деб атайди. Бола ўртоқлари билан кун иссиғида шу ҳовузда чўмилган ва жуда қисқа фурсатда вафот этган. Маҳалла одамлари жасадни ҳовуздан олиб чиқишган», — дейди «Кесакли» МФЙ раиси Ислом Барраев.
Изоҳ (0)