Президент Администрацияси томонидан тонировка нархини камайтиришга оид қарор лойиҳаси ишлаб чиқилган. Бу ҳақда депутат Дониёр Ғаниев ўз Telegram каналида маълум қилди.
«Ҳамкасбим Баҳром Раҳмоналиев билан тонировка нархини пасайтириш юзасидан 2—3 хил таклифлар тайёрлаб, Вазирлар Маҳкамасига киритишдан аввал Ички ишлар вазирлигига таклифларимизга муносабат билдиришларини сўраб, депутатлик сўрови юборгандик.
Бугун Ички ишлар вазирлигидан сўровимизга жавоб келибди. Ёмон томони, ҳар доимгидек сўровга аниқ жавоб йўқ, таклифларимизга ҳеч қандай муносабат билдирилмаган.
Яхши томони, жавобда айтилишича, тонировка нархини камайтириш юзасидан Президент Администрацияси томонидан қарор лойиҳаси ишлаб чиқилган ва бу лойиҳага Ички ишлар вазирлиги томонидан тегишли таклифлар билдирилган», — деб ёзади депутат.
Эслатиб ўтамиз, Ўзбекистонда 2021 йил 1 сентябрдан ҳайдовчилардан транспорт бошқариш учун ишончнома ва тонировка рухсатномасини талаб этиш тартиби бекор қилиниши ҳақида хабар берилганди.Аввалроқ Ўзбекистонда тонировка учун рухсатномаларни Ягона интерактив давлат хизматлари портали орқали ҳам бериш бошлангани ҳамда Ўзбекистонда қарийб 1,5 йилда «тонировка» учун 302 миллиард сўмдан ортиқ маблағ ундирилгани ҳақида хабар берилганди.
Изоҳ (0)