Евро—2020. Англия «қадрдон» хорватларга қарши, Нидерландия эса Шевченконинг Украинаси билан ўйнайди

Евро—2020 баҳслари давом этади. 13 июнь куни C ва D гуруҳидаги ўйинлар бўлиб ўтади. Англия — Хорватия ўйини 3-кун баҳсларини бошлаб берса, Австрия ва Шимолий Македония ўртасидаги ўйин давом эттиради. 13 июнга белгиланган ўйинларни Нидерландия — Украина учрашуви якунлаб беради.

Англия

Саутгейт шогирдлари Евро иштирокчилари ичида энг яхши формадаги жамоа бўлиб турибди. Мусобақага келгунга қадар эришилган ғалабалар келажакдаги муваффақият гарови бўлиши мумкин. Бир жиҳатни ҳисобга олиш лозим, Англия терма жамоаси ҳали жиддий рақибларга дуч келмади. Левандовскисиз Польшани ҳам шу ҳисобга қўшиш мумкин. Шундай бўлса ҳам уларда ўзига бўлган ишонч юқори. Англия гуруҳ босқичининг яққол фаворити.

Англия Хорватияга қарши ўйинда ҳақиқий мезбон сифатида иштирок этади

Англиянинг асосий устунлиги Евро—2020 ни ўз уйида бошлаши. Хорватияга қарши ўйин «Уэмбли»да бўлишини ҳисобга олсак, минглаб мухлисларнинг қўллаб-қувватлаши инглизларни устунлигини таъминлайди. Англия хорватлар билан ўз уйида 5 марта ўйин ўтказган бўлса, фақат биттасида мағлубиятга учраган. Хорватияликлар учун «Уэмбли» ёмон таассурот қолдирган стадионлардан бири. 2009 йилда шу ерда Хорватия ўз тарихидаги энг йирик мағлубиятлардан бирини (5:1) қабул қилган.

Хорватия

Хорватия ҳар йили футбол оламига янги юлдузларни кашф этиб берадиган мамлакатлардан бири. Аммо уларнинг терма жамоада порлаб кетиши жуда қийин, айниқса мураббий уларга ишонч билдирмаса. Златко Даличнинг жамоасида ёш футболчилар кам. Уни устига хорватларда авлодлар алмашинуви бўлиши кутиляпти. Далич фахрий футболчилардан максимал даражада фойдаланиб қолмоқчи. Модрич, Перишич, Вида, Ловрен каби футболчилар кейинги Еврода иштирок этмаслиги мумкин.

Крамарич ёки Петкович? Златко Далич учун асосий саволлардан бири

Хорватия терма жамоасида ҳар бир позицияда танлов муаммоси у қадар юқори эмас. Лекин ҳужум чизиғида иккита бир хил даражадаги футболчилар тўп суради. Мураббий учун ёқимли бошоғриқ бўлиши мумкин. Крамарич ёки Петкович бўладими, ҳар иккиси ҳам рақиб дарвозабонлари учун хавфли футболчидир.

Мураббийларнинг ўйин олдидан фикрлари:

Хорватия — жанговар руҳ, кучли психология ва тажрибали ижрочиларга эга жамоа. Уларга қарши баҳс жиддий кечади, лекин биз муваффақиятга эришишимиз мумкинлигини биламиз. 2018 йилда Миллатлар Лигасидаги Хорватияга қарши ўйин (2:1) ҳали ҳам ёдимизда. Жуда қийин ўйин бўлганди. Ўтган ўйиннинг бунисига алоқаси йўқ. Лекин бизни оғир синов кутиб турибди.Гарет Саутгейт, Англия терма жамоаси бош мураббийи

Имкони борича энг кучли таркибни майдонга тушираман. Жамоамиз кучли ва биз ҳеч кимдан қўрқмаймиз. Ҳа, Англия тезкор, ҳужумда агрессив ҳаракат қиладиган юқори даражадаги жамоа. Қарши ҳужумлардан максимал фойдаланишимиз зарур. Ҳимоявий ўйнашга мажбур бўлсак-да, натижага эришишга ҳаракат қиламиз.

Златко Далич, Хорватия терма жамоаси бош мураббийи

Мавзуга доир: Ўз уйидаги финалда иштирок этишни кўзлаган «уч шерлар», тажрибали Хорватия, Шотландиянинг қайтиши ва барқарор чехлар. Евро—2020 D гуруҳи ҳақида

Австрияликлар мусобақадаги «кутилмаган меҳмон»га қарши

Австрия терма жамоаси гуруҳ босқичидан уёғига ўта олмасди. Бу сафар уларда имконият бор. C гуруҳидаги рақиблари ўзи билан деярли бир хил даражадаги терма жамоалар. Албатта, Нидерландияни ҳисобга олмаса. Бир пайтлар фақат Давид Алаба терма жамоанинг машҳур футболчиси бўлган бўлса, энди Арнаутович, Забитцер, Баумгартлингер каби юлдузлари бор. Уларнинг рақиби мусобақага «кутилмаган меҳмон» сифатида ташриф буюрган Македония термаси. Македонияликлар саралаш босқичида 3-ўринни эгаллаганди. Аммо Миллатлар Лигасидаги иштироки туфайли ўтиш ўйинларида қатнашди ва Евро—2020 йўлланмасини қўлга киритди. Македонияликлар ҳам финляндияликлар сингари Евро мусобақасида дебютини ўтказяпти.

Жамоаларнинг охирги 5 ўйини натижалари: 

Мавзуга доир: Етакчисиз қолган Нидерландия. Ким тарихга киради: Украина, Австрия ёки дебютант Македония? Евро—2020 C гуруҳи ҳақида

Парвози ўхшамаётган «учар голландлар» Шевченко жамоасига қарши

Нидерландия терма жамоаси саралаш босқичини кўтаринки кайфиятда ўтказган. Куман шогирдлари (Рональд Куман саралаш босқичида Нидерландия бош мураббийи эди) фақатгина немисларга мағлуб бўлганди. Куман «Барселона»га ўтгач, унинг ўрнини Фрэнк де Бур эгаллади. Мураббий учун катта муаммо бор: Виржил ван Дейк мусобақада иштирок эта олмайди. Жароҳатидан тузалмаган ҳимоячининг ўрнини босиш қийин бўлади. Де Бурнинг бахтига гуруҳ босқичида нисбатан осонроқ рақиблар тушди. Биринчи учрашув Андрей Шевченко бошчилигидаги Украина терма жамоасига қарши бўлади. Украина саралаш босқичида Португалиядан устун келганди. Шевченко шогирдлари ҳам Еврода янги саҳифа яратиш истагида.

Жамоаларнинг охирги 5 ўйини натижалари: