Евро—2020 мусобақасининг иккинчи кунида даҳшатли воқеа юз берди. Дания — Финляндия учрашувида данияликлар ярим ҳимоячиси Кристиан Эриксен биринчи бўлим якунланиши арафасида майдонда ҳушидан кетди.
Шифокорлар унинг ҳаётини сақлаб қолди ва Эриксен шифохонага олиб кетилди. Учрашув аввалига бир кун кейинга қолдирилди, бироқ кейинчалик яна давом эттирилиши белгиланди. Таъкидланишича, Кристиан жамоадошларига қўнғироқ қилган ва ўйинни давом эттиришларини сўраган.
Учрашув воқеадан 1,5 соат ўтиб, қолган жойидан давом эттирилди. Бутун стадион ва Финляндия вакиллари майдонга қайтган Дания футболчиларини қарсаклар билан кутиб олди.
Аввалига биринчи бўлимнинг қолган икки дақиқаси ўйнаб қўйилди, кейин 5 дақиқалик танаффусдан кейин иккинчи бўлим бошланди. Устунлик Дания томонидан бўлсада, жамоа яққол вазиятлар ярата олмади ва кутилмаганда ўз дарвозасидан тўп олиб чиқди.
Дания дарвозасини ишғол қилган Финляндия футболчиси Жоэл Поҳянпало голни хурсандчилик билан нишонлай олмади ва қўлини юқорига кўтарди.
Ушбу баҳсда данияликлар сардори Симон Кьер учрашув охиригача ҳаракат қила олмади. Мураббийнинг сўзларига кўра, жамоа етакчиси Эриксен билан содир бўлган вазият туфайли ўзига кела олмаган. Қайд этиш керак, сардор Эриксен майдонга қулаган вақтда шифокорлар келгунга қадар унга ёрдам кўрсатган, кейин эса уни камералардан яшириш учун футболчиларни Кристианнинг атрофини ўраб олишга буюрганди.
Ўйин Финляндиянинг сенсацион ғалабаси билан тугади. Эриксен эса учрашувнинг энг яхши ўйинчи деб топилди.
Бир неча соат қийин онларни бошдан кечирган футбол оламининг деярли барча вакили Эриксенни қўллаб-қувватлади ва бунда давом этмоқда
Ромелу Лукаку Россияга урган голидан кейин камера қаршисига келди ва «Интер»даги шеригига мурожаат қилди: «Крис, Крис... Мен сени яхши кўраман!». Ўйиндан кейин Лукаку воқеани кўриб, кўп йиғлагани ва ўйин давомида ҳам хаёли фақат Эриксенда бўлганини айтди.
Криштиану Роналду биринчилардан бўлиб Эриксенни қўллаб-қувватлади: «Бизнинг ҳаёлимиз ва дуоларимиз Кристиан ва унинг оиласига қаратилган. Дунё футболи аҳли биргаликда яхши хабар кутиб турибди. Биз яна майдонда учрашишимизни кутиб қоламан, Крис! Бардам бўл».
Германия терма жамоасининг барча аъзолари Эриксеннинг сурати фонида суратга тушди ва Кристианга соғлиқ тилади.
Шу жумладан Ўзбекистон футбол ассоциацияси ҳам: «Тезроқ тузалиб кетишингни тилаб қоламиз. Ўзининг энг яхши футболингни намойиш қилиш учун яна майдонга қайтишингга ишонамиз».
Жанубий Корея ҳужумчиси Сон Ҳён Мин ЖЧ—2022 саралаши доирасида Ливанга қарши кечган ўйиндаги голини собиқ жамоадошига бағишлади. Сон голни нишонлаш вақтида 23 рақамини (Эриксен «Тоттенҳэм»да шу рақам остида ўйнаган) намойиш қилди.
Худди шу тариқа Кристианнинг «Интер»даги жамоадоши Ашраф Ҳакими ҳам Буркина-Фасога урган чиройли голини Эриксенга бахшида этди.
Эриксен билан бунга қадар юрак билан боғлиқ ҳеч қандай муаммо бўлмаган
«Эриксен йиқилганидан кейин бизни майдонга чақиришди. Югуриб борганимизда, у майдонда ётар ва нафас олаётганди, шунингдек, юраги ҳам уриб турганди. Кейин вазият бирданига ўзгарди ва биз унинг юрагини массаж қилдик. Стадион тиббиёт ходимларидан тез тиббий ёрдамни олдик ва уни сақлаб қолишга эришдик. Кристиан шифохонага кетишидан аввал мен билан гаплашди», — дея эслайди Дания терма жамоаси шифокори Мортен Бесен.
Ўйинчи «Тоттенҳэм»да фаолият юритган вақтда (2013—2020 йиллари) унинг юрагини кўрикдан ўтказиб келган Санжай Шарма вазият ҳақида ўз фикрларини билдирди.
«Унда юрак билан боғлиқ яққол муаммо йўқ эди. Тиббий кўрикларнинг барчасини ўзим ўтказганим учун буни кафолатлай оламан. Унинг ҳолатидан кейин ўйлаб қолдим: наҳотки, биз ниманидир ўтказиб юборган бўлсак? Шундан кейин унинг тест натижаларини яна бир бор кўриб чиқдим. Улар аъло даражада», — дейди Шарма.
«Интер» бош шифокори Перо Волпи ҳам футболчининг юрагида ҳеч қачон муаммо бўлмаганини таъкидлади.
«Биз ёмон онларни бошдан кечирдик. Нафақат мен, балки бутун «Интер» оиласи. Дарҳол чуқур изланишларни олиб борамиз. Эриксен айни вақтда яхши ҳолатда экани муҳим, бироқ унда муаммо йўқ эди. Муаммо борлигига заррача ишора ҳам йўқ эди. На «Тоттенҳэм»да, на «Интер»да. Бу Италияда жуда қаттиқ назорат қилинади», — дейди Волпи.
Айни дамда Кристиан Эриксеннинг ҳолати барқарор бўлиб турибди. У кейинги тиббий кўриклардан ўтиш учун ҳозирда ҳам шифохонада қолмоқда. Футболчи 13 июнь тонгида жамоадошлари билан алоқага чиққан ва ўзини яхши ҳис қилаётганини айтган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)