Хитой ҳукумати АҚШ маъмуриятининг TikTok ва WeChat дастурларидан фойдаланишга қўйилган тақиқни бекор қилиш қарорини ижобий қадам деб атади. Бу ҳақда Хитой Тижорат вазирлигининг расмий вакили Гао Фэнга таяниб «Известия» хабар берди.
«АҚШ WeChat ва бошқа дастурларга қўйилган тақиқларнинг бекор қилинганини эълон қилди. Бу тўғри йўналишдаги ижобий қадам ҳисобланади», — деди Гао Фэн.
Шунингдек, унинг таъкидлашича, Хитой ҳукумати АҚШнинг хорижий дастурлардаги хавфсизлик масалаларини назоратдан ўтказиш сўровига эътибор қаратди. Шу билан бирга, Фэн АҚШнинг хорижий инвестициялар қўмитаси ҳозиргача TikTok билан боғлиқ текширув ўтказаётганини таъкидлади.
«Умид қиламизки, АҚШ Хитой компанияларига холис ва адолатли муносабатда бўлиб, савдо-иқтисодий масалаларни сиёсийлаштиришдан чекланади», — деб қўшимча қилди Тижорат вазирлиги вакили.
Аввалроқ Жо Байден собиқ президент Дональд Трампнинг алоқа ва молиявий технологиялар учун TikTok, WeChat ва бошқа саккизта дастурий таъминотдан фойдаланишни тақиқлаш тўғрисидаги фармонини бекор қилди. Таъкидланишича, амалдаги давлат раҳбарининг маъмурияти очиқ, ишончли ва хавфсиз интернетни қўллаб-қувватлайди.
Маълумот учун, 2019 йилнинг ноябрь ойида АҚШ миллий хавфсизлик органи TikTok ижтимоий тармоғининг эгаси — Хитойнинг ByteDance Technology компанияси устидан тергов бошлаган эди.
Трамп 2020 йил 6 август санасида TikTok ва WeChat дастурларига нисбатан «Таҳдидга қарши кураш тўғрисида»ги фармонни имзолаган эди. У ўз талабларини миллий хавфсизлик масалалари ва Америка фуқароларига тегишли маълумотларнинг Хитой расмийларига етказилишидан хавотирда экани билан изоҳлаган.
Изоҳ (0)