Ummonning Telekommunikatsiyalar nazorati boshqarmasi (TRA) Clubhouse ijtimoiy tarmog‘ini blokladi. Bu haqda WAF agentligiga tayanib “Kommersant” xabar berdi.
Foto: Vox
Bloklanishning sababi ijtimoiy tarmoqning TRA ro‘yxatidan o‘tmaganligi bo‘ldi.
“Clubhouse dasturi bloklandi, chunki internet orqali audio va videoaloqa uchun foydalaniladigan aloqa dasturlarining barchasi boshqarmadan litsenziya olishi kerak. Ummonda ro‘yxatdan o‘tmagani uchun dastur faoliyati to‘xtatildi”, — deb xabar berildi TRA mijozlar xizmatida.
Ummonda aloqa uchun shifrlangan kanallar (VoIP) yordamida ishlaydigan dasturlardan foydalanish taqiqlangan. Lekin koronavirus pandemiyasi tufayli davlat tashkilotlari va maktablar faoliyatini ta’minlash uchun Skype, Google Meet va Zoom kabi dasturlarga nisbatan cheklovlar susaytirildi.
Clubhouse 2020-yilning mart oyida ishga tushirilgan, lekin foydalanuvchilar soni 2021-yilning boshida sezilarli darajada ko‘paydi. Yanvar oyining oxirida dastur bir hafta ichida 2 million faol foydalanuvchiga ega bo‘ldi. Fevral oyi oxirida esa 10 milliondan oshdi. Hozir dastur 1 milliard dollarga baholanmoqda.
Avvalroq Pokiston sud qaroridan keyin TikTok ijtimoiy tarmog‘ini bloklashi haqida xabar berilgan edi. Peshavor shahri yuqori sudining ta’kidlashicha, sud tarmoqning axloqsiz kontent tarqatayotgani haqidagi arizachining dalillari bilan tanishib, dasturni bloklash to‘g‘risida buyruq bergan. TikTok’ning Pokistondagi vakilining aytishicha, u sud qarori haqida eshitgan va kompaniya keyinroq bu masala yuzasidan izoh beradi.
