Байден Трампнинг TikTok ва WeChat’ни тақиқловчи фармонларини бекор қилди

АҚШ президенти Жо Байден 9 июнь куни Хитойнинг TikTok ва WeChat сервисларига қўйилган чекловларни бекор қилиш тўғрисидаги фармонни имзолади. Бу ҳақда Оқ уй матбуот хизматига таяниб «РБК» хабар берди.

Гап 2020 йилнинг августида собиқ давлат раҳбари Дональд Трамп томонидан имзоланган фармонларни бекор қилиш ҳақида кетмоқда. Фармонлар орқали TikTok видеохизмати ва WeChat мессенжерига эгалик қилувчи Хитойнинг ByteDance ва Tencent компанияларига чекловлар қўйилганди.

Трампнинг фармонларига мувофиқ америкаликларга ушбу компаниялар билан бирор иш олиб бориш ва улардан реклама сотиб олиш тақиқланган. Ушбу тақиқни бузган АҚШ фуқаролари жаримага тортилиши мумкин эди.

Трамп маъмуриятининг ҳаракатлари Хитойга қарши санкциялар сиёсати доирасида амалга оширилган. Трамп Хитой дастурлари ХХР расмийлари билан алоқада экани ва разведка идораларига америкалик фойдаланувчиларнинг шахсий маълумотларини тўплашга ёрдам беришини таъкидлаган. Бу ўз навбатида, Пекинга федерал ходимларнинг ҳаракатларини кузатиб бориш, корпоратив жосуслик қилиш, америкаликларга нисбатан шантаж ва шу орқали миллий хавфсизликка таҳдид солиш имконини ҳам яратади.

Трамп томонидан TikTok ва WeChat’га қўйилган чекловлар ўрнига Байден АҚШ Савдо вазирлигини Вашингтоннинг потенциал рақибларига алоқадор бўлган ҳамда Америка манфаатларига таҳдид солиши мумкин бўлган хорижий мобил дастурларни синчковлик билан текширишга мажбур қиладиган янги ҳужжатни имзолади.

3 июнь куни эса Байден америкаликларга Хитойнинг 59 та компанияси акцияларини сотиб олишни тақиқлаган эди. Улар орасида дунёдаги энг йирик телекоммуникацион компаниялардан Huawei, China Mobile Communications Group Co., Ltd., China Telecommunications Corporation ва бошқа алоқа корхоналари бор.

Байденнинг ушбу фармони ундан олдинги президент Дональд Трамп даврида қабул қилинган чораларни тўлдиради. 2021 йилнинг январь ойи бошида Дональд Трамп администрацияси Хитойнинг 10 та компаниясини «қора рўйхат»га киргизган.