Сурхондарё вилояти Қизириқ туманида яшовчи 23 ёшли аёл ўзининг бир ёшли қиз фарзандини сотмоқчи бўлганида қўлга олинди. Бу ҳақда «Севимли» телеканалининг «Замон» информацион дастурида маълум қилинди.
Маълум қилинишича, боланинг онаси жарқўрғонлик аёл билан тил бириктириб, шартли исми ўзгартирилган Дилнозага бир ёшли қизини сотмоқчи бўлган. Бироқ ушбу ҳолат қонунга зид эканлигини билган Дилноза ҳуқуқни ҳимоя қилиш органларига мурожаат қилган.
ИИБ ходимлари томонидан ўтказилган тадбир давомида аёл ўз фарзанди учун 12,6 миллион сўм пулни олаётган вақтда қўлга олинган.
«Мен боламни сотмоқчи эмасдим. Боқа олмаганим учун бериб юбораётгандим. Шароитим оғир, ота-онам ҳам боламни қабул қилмаяпти», — дейди аёл.
Аввалроқ Тошкентда 13 ёшли қизини 3,5 минг долларга сотишга уринган аёл ушлангани, Бухорода янги туғилган чақалоқни 8 млн сўмга сотмоқчи бўлган она ва бола қўлга олингани, Андижонда 3 ойлик чақалоғини 700 долларга сотишга уринган аёл ушлангани тўғрисида хабар берилганди.
Изоҳ (0)